Амансызбы, бурадар? Өлкөдө 10:15. Спикер Турсунбеков кетти, ордуна ким келет?

© Sputnik / Табылды КадырбековЗдание Жогорку Кенеша в Бишкеке
Здание Жогорку Кенеша в Бишкеке - Sputnik Кыргызстан
Жазылуу
Кутман таң! Агарып аткан таң баарыбызга жакшылыктарын гана тартууласын.

Баалуу экспонаттар кайда? Мумиянын арты менен эми тарых музейиндеги экспонаттар да тыкыр көзөмөлгө алына баштаган өңдүү. Коопсуздук кеңешинин катчылыгы Эсеп палатасына таянуу менен Мамлекеттик тарых музейинде 503 экспонат жоголуп, анын 29у — баалуу металл экенин билдирди. Буга Маданият министрлигинин шалаакылык мамилеси себеп деген Коопсуздук кеңешинин катчылыгы Башкы прокуратурага алардын ишмердүүлүгү боюнча козголгон кылмыш иштерине анализ жүргүзүүнү сунуш кылды.

Жаңылык эмес. Ал ортодо аталган министрликте мурда жетекчи болуп кеткендердин айрымдары экспонаттардын жоголгону жаңылык эмес десе, кээ бири бул боюнча эч кандай маселе көтөрүлбөгөнүн айтып чыгышты.

Сактыкта кордук жок. Борбор калаада жаңы салынып жаткан көп кабаттуу үйдүн жанындагы курулуш урап түшүп, андан жабыркап, ооруканага жеткирилгендердин экөө учурда дарыланып жатат. Алардын абалы менен кабарчыбыз Гүлдана Талантбекова барып таанышып, окуя тууралуу билип келди.  

Курулуш демекчи, бир кезде калаадагы эң барктуу жайлардын бири аталган "Нарын" ресторанын түрттүрүү иштери башталды. Эми анын ордуна "Хуалинь" деп аталган 20 кабат мейманкана курулат экен.

Боордоштор бир жерге отурукташты. Памирден келген кыргыздар Нарын районунун Куланак айылына жайгаштырылып, эми алар №86 кесиптик лицейде жашап, билим ала башташат.

Ал эми жаңы төрөгөн памирлик келин уулунун атын Алмазбек коюптур. 38 жаштагы Жанбүбү Маматзайым кызы буга чейин 9 жолу төрөсө, анын үчөө эле тирүү экен.

Саясат жаатында деле жаңылык көп. Жогорку Кеңештин төрагасы Чыныбай Турсунбековду кызматтан кетти. Бул маалыматтан кийин көпчүлүгү ал кетсе ордуна ким келет же Жогорку Кеңеш тарайбы дешип ар түрдүү пикирлерди айта башташты.

Баса, коопсуздук боюнча вице-премьерлик кызматына Талас облусундагы өкмөттүн ыйгарым укуктуу өкүлү Даир Кенекеевдин талапкерлиги каралып жатат. Буга чейин бул кызматты маркум Темир Жумакадыров аркалап келген.

Валюта наркы. Сомдун баасы долларга карата орто эсеп менен 68.41 (сатып алуу) жана 68.66 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгүсү 41.90 сом, АИ-92 үлгүсүндөгүсү 39.40 сом, ал эми дизель майы 37.50 сомдон сатылууда.

Соңку сөз. Жакшы жаңылыктар көп болсун!

Аманчылык каалап, Таалайгүл Усенбаева.

Жаңылыктар түрмөгү
0