Билимин берген мугалим эжем,
Эсимден кетпейт элесиң!
Сөзүбүздүн башында мугалимдик кесипти аркалаган бардык агай-эжелерди, ини-сиңдилерди жана курбу-курдаштарды кесиптик майрамы менен чын жүрөктөн куттуктайбыз!
Баары эле мугалим боло албайт. Бул кесип өтө татаал жана жоопкерчиликтүү экенин мен жон терим менен сезгенде билгем. Кесибим боюнча кыргыз тилчи мугалим болгондуктан 4-5-курста шаардагы мектептерге эки айга практикага чыктым. Мага 10-класстын окуучулары туш болду. Башында "шаардын балдары тентегирээк болчу эле" деп ичимен кичине санааркадым. Жаңы барганда кыздары баштан аяк сынап карап, балдары тил албайт. Бирок эки-үч күндөн кийин эле баары менен жакшы тил табышып алдык. Антсе да чоңоюп калган балдарды же уруша албайсың, эптеп алдап эки ай сабак бердим. Себеби өткөөл курак болуп баарынын колунан телефон түшпөйт. Аларды кызыктырыш үчүн ар түрдүү ыкмаларды колдонуп, күндө көрсөтмө курал даярдап, план-конспект жазып, айтор, эки айдын ичинде чындап эле жүдөп кеттим. Анысы аз келгенсип көрсөтмө курал алганга өз чөнтөгүңөн акча чыгармай. Айтор, мугалимдерди ошондон кийин мурдагыдан да баалап калгам!
Эрки күчтүү экен. "Эң ажарлуу мугалим – 2017" сынагында биринчи орунга татыган 21 жаштагы Альбина Арстанбек кызы мага окшоп кесибин таштап салбай, толугу менен сүйгөн ишине берилген. Азамат!
Ал эми президенттик тактыга талпынып жаткан талапкерлер биринчи кезек ушул мугалимдердин айлык акысын көтөрүүнү ойлонушса жакшы болот эле. Кечээ КТРКда болгон дебатта да бул маселе көтөрүлдү.
Сапары карып бараткан президент Алмазбек Атамбаев болсо, кетээр маалында маанилүү маселелерди чечип жатат. Кечээ ал коңшу өлкө Өзбекстанга мамлекеттик сапары менен барып, аны өзбек эли кучак жайып тосуп алды.
Пайдалуу иш. Иш сапар учурунда кол коюлган документтердин тизмесин бул жактан окуңуздар.
Мистика. Өлкөдө болсо күн сайын кызыктуу жаңылыктар болуп жатат. Алсак Жаштар аллеясындагы көз айнек кантип сынып жатканы видеого түшүп калган. Таң калычтуу.
Оозуңуз ачылат. Андан да кызыгы биз дүкөндөрдөн алып жүргөн тоңдурулган тоок, балык эти музу эригенден кийин бир топ эле салмагын түшүрөт экен. Ишенбей жатсаңыз бул материалды окуңуз.
Валюта наркы. Сомдун баасы долларга карата орто эсеп менен 68.18 (сатып алуу) жана 68.51 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 40.50 сом, АИ-92 үлгүсүндөгүсү 37.50 сом, ал эми дизель майы 35.30 сомдон сатылууда.
Соңку сөз. Ар бир кесип —ардактуу!
Ар бириңизге жакшы маанай каалап, Таалайгүл Усенбаева.
