Амансызбы, бурадар? Өлкөдө 10:15. Сулуунун өмүрүн алып тынган айыкпас оору

Жазылуу
Кутман таң! Жайдын саратанында эс алууга Көлдү, жайлоону көздөй агылгандар арбын болсо керек. Ал эми калаада адаттагыдай иш кызып, эл таң атпай кызмат, жумуштарына шашып жөнөдү. Анткени бүгүн апта башы. Бизде жумуш кызуу башталды.

Анча-мынча бийчини артта калтырган "келин". Instagram колдонуучусу Сайкал Жумалиева келин образында бийлеген жаңы видеосун социалдык тармакка жүктөп, көпчүлүктүн көңүлүн көтөрдү. Буга чейин да өзгөчө бийлери менен күйөрман топтой баштаган " келин" бул сапар кара түстөгү халат кийип алып Бейонсенин ырынын ыргагы менен айыл ичинде бийлеген.

"Даң-даңчы" Эмил. Акыркы эки айда интернет айдыңында "Чала спортик" аталышындагы кыскача видеолор популярдуу болууда. Спорт залга бир-эки жолу баш багып алып, "даң-даң" деп төш каккан чала спортчунун ролун актер Эмил Эсеналиев аткарат. Кабарчыбыз Гүлдана Талантбекованын жаш актер менен болгон маегин бул жактан окугула.

Белгилүү комузчу Самара Токтакунова айылга кат жазды. Ал катында Бишкектен кол сунса жетчүдөй болгон Кызыл-Сууну, кичине кезинде керки менен чапкан комузун эстеди. 

Трамп Франциянын канайымына суктанганда. АКШ президенти Дональд Трамп Франция лидери Эммануэль Макрон менен сүйлөшүүлөр болор алдында анын жубайы Брижит Макрондун мүчөсү келишип турганын айткан. Бул учурду өз көзүңүз менен көргүңүз келсе, дароо шилтеме аркылуу кириңиз. 

© Sputnik / Жоомарт УраимовФутболчу Айдана Оторбаева
Футболистка сборной Кыргызстана и мастер спорта КР Айдана Оторбаева - Sputnik Кыргызстан
Футболчу Айдана Оторбаева

Аянычтуу тагдыр менен коштолгон ийгилик. 21 жаштагы спортчу Айдана Оторбаева 7-июль күнү футбол боюнча Кыргызстандын спорт чебери аталды. Бирок ийгиликке жеткен менен спортчу кыздын жүрөк ооруткан окуясы бар экен. Айдананын жетишкендиги жана азаптуу күндөрү тууралуу кабарчыбыздын материалына көз чаптырыңыз

Жаман дарт акыры сулуунун өмүрүн алып тынды. Апта соңунда "Кыргызстан чүрөгү — 2013" наамынын ээси Жибек Нукеева көз жумган. Айыкпас дартка кабылган Жибектин артында бир уулу калды. Аттиң… Жакындарына көңүл айтуудан башка арга жок…

Бүгүн өлкө аймагында күн ачык болот.

Валюта наркы. Сомдун баасы долларга карата орто эсеп менен 69.85 (сатып алуу) жана 69.25 (сатуу) сомду түздү.

Мунай баасы. Бишкекте орточо эсеп менен алганда АИ-92 үлгүсүндөгү бензин 38.90 сом, АИ-95 үлгүсүндөгүсү 41.10 сом, ал эми дизель майы 36.90 сомдон сатылууда.

Соңку сөз. Биринчи байлык ден соолук.

Жагымдуу күн каалап, Таалайгүл Усенбаева.

Жаңылыктар түрмөгү
0