Амансызбы, бурадар? Өлкөдө 10:15. Жатаканадагы "кыздардын ыйы", музейдеги мумия

© Sputnik / Табылды КадырбековОбщежитие Бишкекского Гуманитарного Университета в 7-микрорайоне Бишкека
Общежитие Бишкекского Гуманитарного Университета в 7-микрорайоне Бишкека - Sputnik Кыргызстан
Жазылуу
Кутман күн! Калаада таң эртеден кымкуут, ызы-чуу башталат. Бири балдарын бакчага таштап жатса, айрымдары унааларын тызылдатып кызматка шашып бара жаткандар... Күндө ушундай окшош көрүнүш, убакыт зымылдап учуп жатат.

Ары-бери карагычакты күз деле келип калат. Дегеним, президенттик шайлоого да аз калды. Жогорку Кеңеш президенттик шайлоонун күнүн расмий бекитип, ал 15-октябрда өтмөй болду.

Ага чейин Көлгө барып эс алып, мээни сергитип, кимди шайлаарды жакшылап ойлонолу! Отель жана мейманканалардын кожоюндарынын айткандарына караганда быйыл баа бир топ төмөндөп, көпчүлүккө жаккан жай болору күтүлүүдө.

"Амалкөй" кыздын кылыгы. Бишкек шаарында таанышынын унаасын эки саатка айдап кетип, аны күрөөгө тапшырып салган кыз кармалды. Адамдан амал качып кутулбайт деген ушу да. 

Көзүңдү кара! Телефон деген "балээ" чоңунан кичинесине чейин азгырып, аны адамдар ажатканага кирсе да, көчөдөн өтүп бара жаткан учурда, ал тургай уктап жатканда да жанына кучактап жатып калышты. Жолдо баратып телефон тиктегендерди кабарчылар барып тартып келип, жолдон минтип өтпөш керектигин көзгө сайып көрсөттү.

Кулагыңарга күмүш сырга! Жаңы үйлөнгөн жаш жубайлардын никелешүү учурунда эмне кылганга болбой турганын билчү белеңиздер? Кызык болсо толугураак бул жактан окуңуздар.

Көрүнчү көрдүңөр беле? Бишкек шаарында атактуулардын арбактары калып калган театрлар, көрүстөндүн үстүнө салынган имараттар жана Тарых музейиндеги мумия тууралуу имиштер бар экен. Аларды кабарчыбыз Бегимай Бакашева сураштырып, окуяларын тизмектеп чыкты

Баса, кыргызстандык зыяратчыларга Меккедеги бир мейманканадан 1500 орун берилди.

Бүгүн өлкөнүн айрым аймактарында жамгыр жаайт.

Валюта наркы. Сомдун баасы долларга карата орто эсеп менен 68.34 (сатып алуу) жана 68.61 (сатуу) сомду түздү.

Мунай баасы. Бишкекте орточо эсеп менен алганда АИ-92 үлгүсүндөгү май 39.50 сом, АИ-95 үлгүсүндөгү бензин 42.00 сом, ал эми дизель майы 37.50 сомдон сатылууда.

Соңку сөз. Ишиңер оңунан чыгып, итиңер чөп жесин.

Ачык асман, жакшы маанай каалап Таалайгүл Усенбаева.

Жаңылыктар түрмөгү
0