Бүгүн кыштын акыркы күнү. Буюрса, аман турсак эртең жаз келет. Жаз менен кошо жаңылануу, өзгөрүү болот. Тоолор гүлгө толуп, айлананы жыпар жыт каптайт. Гүл менен кошо кымча бел сулууларыбыз ачылып, жашоо жарк эте түшөт. Ушинтип эле жазды жакшынакай болуп тосуп алчу эмес белек… Көптөн бери…
Быйыл андай болбой калды өңдөнөт. Ага себеп, "Ата Мекен" фракциясынын лидери Өмүрбек Текебаевдин камалышы. УКМК менен Ак үйдүн алдындагы митингдер бийликтегилерди сестенте албады окшойт, окуя Текебаевди 2 айга камоо менен аяктады. Эмнеси болсо камагандар эси менен чечим чыгарып, баарын эсептеди деп туралы.
Элге тынчтык керек. Эки тизгин бир чылбыр кимдин колуна өтөөрү көп деле маанилүү эмес. Бактыга жараша, баары эле өз тирилигин кылып, мамлекеттин көзүн карагандар аз. Андыктан саясий оюндарга элди кошпой эле коюшса дурус болмок.
Анан да чоңдордун келиши менен карапайым калк эле кыйналат. Кайрадан жол тосмой, тыгындар… Айла жоктон тилди тишке басасың. Бүгүн кайсыл көчөлөр жабылаарын бул жактан көрүп алыңыздар.
Буура сан кыздардан тарта Текебаевдин жактоочуларына чейин. Апта ирмеми көрөм дегендер болсо кош келиңиздер.
Ал эми ажылык сапар тууралуу билгиңиз келсе, Sputnik Кыргызстан агенттигинин мультимедиалык борборунда өткөн маалымат жыйында айтылган кепке назарыңыздарды бурабыз.
Валюта наркы. Бүгүн сомдун баасы долларга карата орто эсеп менен 69.04 (сатып алуу) жана 69.30 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.00 сом, Аи-95 үлгүсүндөгү бензин 40.50 сом, ал эми дизель майы 35.30 сомдон сатылууда.
Соңку сөз ордуна. Бирде жигит төө минет, бирде жигит жөө жүрөт.
Амандыгыңызды тилеп, Исмаил Мамытов.
