Амансызбы, бурадар? Өлкөдө 10:15. "Салянова" деп кыйкыргандар, Россиядагы жол кырсыгы

Жазылуу
Мекенден алыс жүргөн жердештерге амандык жана бөөдө кырсыктан алыс болушун каалайбыз.

Аман-эсенчилик тилейбиз. Россиянын Новая Москва аймагында кечээ ири жол кырсыгы катталып, анда 9 киши каза болуп, 12 киши жаракат алган. Каза болгондордун арасында Кыргызстандын жарандары да бар экени алгач айтылып, кийин бул маалыматты биздин элчилик төгүндөдү. 23 жаштагы бир жараныбыз гана жабыркап, ал ооруканага жеткирилген. Түн жарымына чейин Тышкы иштер министрлиги менен элчиликтин телефонун тындырбай чалып "мекендештерибиз арасында болбой калса экен" деп тилеп жаттым…

Кандуу январь. Жаңы жылдын биринчи айы да бир топ жүрөктүн үшүн алган кырсыктар менен коштолду. Дача айылына кулап түшкөн учак, ата-энесин өлтүрө сабаган бакма бала… Эх, жалган дүйнө, кайран дүйнө…

Кыйылган кырчын өмүр. Бишкек шаарынын Чыгыш-5 аймагынан окуучу бала терезеден секирип каза болду. Анын өлүмүн акыркы учурда социалдык тармакта катуу талкууга алынган "Тихий дом", "Синий кит" оюндары менен да байланыштыргандар болду. Негизи эле бул чуулгандуу оюндан балдарды сакташ үчүн ата-энелер билиши керек болгон 9 нерсени бул жактан окуңуздар

Бул окуялардын таасири Чүй проспектиси менен Панфилов көчөсүндөгү дубалга тартылган граффитиге дагы тийип, белуха китинин сүрөтүн имараттын ээси ак түскө боёп салды

Салянованы чыгаргыла! Мурдагы прокурор, азыркы депутат Аида Салянова юстиция министри болуп турганда кызмат абалынан пайдаланган деп Башкы прокуратура иш козгоду эле, УКМК аны суракка чакырды. 1-февралда саат 17.40тарда суракка кирип кеткен депутат кечинде саат ондон өткөндө гана чыкты. Бул учурда УКМК имаратынын алдына чогулган эл бир дуу көтөрүлүп, "Салянова, Салянова" деп эле кыйкырып калышты. Депутат чогулгандарды суукта тоңбой үйүңөргө баргыла деп ыраазычылык айтып, жолго салды.

Жакшы саамалык. Алтайдын ары жагынан байыркы Кыргыз каганаты дооруна таандык рун жазуу эстеликтери табылды. Ташка чегилген жазуу 9-10-кылымга таандык экени айтылууда. Ошондой эле оюнчук боз үйдү ачып, анын ичинде отурган байды, баласын бешикке салып терметкен аялды көрүп, жайыл дасторкондон "даам сызсаңыз" болот. 

Бир нече жылдан бери Стамбулга коюлат деп жаткан "Манастын" эстелиги буюрса быйыл коюлганы калды. Стамбулдун мэриясы эстелик коюла турчу жерди оңдоп-түзөп, көрктөндүрүүгө макул экенин билдирди. Кыргыз эли "Манастап" ураан чакырып эле жүрө берели.

© Фото / Алимджан ВалиевБанкнота нового образца номиналом 200 сомов
Банкнота нового образца номиналом 200 сомов - Sputnik Кыргызстан
Банкнота нового образца номиналом 200 сомов

Чалыр Алыкул Осмонов… Жыл жаңыргандан тарта колдонууга берилген жаңы 200 сомдогу улуу акын Алыкул Осмоновдун көзү чалыр болуп калганын бир катар иш билги дизейнерлер белгилешүүдө. Эски сом менен жаңы үлгүдөгү сомдун айырмачылыгын өзүңүз да көз салып карап көрүңүз.

Валюта наркы. Бүгүн сомдун баасы долларга карата орто эсеп менен 68.30 (сатып алуу) жана 69.59 (сатуу) сомду түздү.

Мунай баасы. Бишкекте орточо эсеп менен алганда Аи-92 үлгүсүндөгү май 39.00 сом, Аи-95 үлгүсүндөгү бензин 41 сом, ал эми дизель майы 35.70 сомдон сатылууда.

Соңку сөз ордуна. Аманчылыкта гана жолугушалы деп Расул Үсөналиев.

Жаңылыктар түрмөгү
0