Амансызбы, бурадар? Өлкөдө 10:15. Белди бекем бууп, алдыга карай бет алалы…

Жазылуу
Ааламга тийген күн нуру баарыбызды жылытсын.

Бул апта каргашалуу башталып, калың эл мүңкүрөп турат. Анткен менен тирүүлүктүн тирилиги уланып, акырындап баары өз ордуна келери да бышык. Ооба, о дүйнөгө узап кеткендердин орду толбойт. Бирок жараткандын башка салган жазмышын көрбөй коюуга да арга жок. Өлгөндүн артынан өлгөн ким бар экен… Белди бекем бууп, жараткандын бул сыноосунан татыктуу өтөлү. Болбосо, жараткан пендеси көтөрө албаган сыноосун бербейт эмеспи. Башкысы бул окуя баарыбыз үчүн чоң сабак болуп, кийинки кырсыктын алдын алсак болгону. 

Кайрымдуулукка үн кошкон бардык замандаштарга алкыш айтабыз. Асыл адамдар менен үзөңгүлөш болуп калганыма сыймыктанам. Заматта чогула калып, дээрлик бардык кызматкерлер маяналарын которуп, ишкерлер төшөк-жуурканын көтөрүп барышты. Бул көрүнүш кыргыз кыйын учурда бир муштум экендигин далилдеди. Ата-бабамдын арбагы ыраазы болду десек аша чапкандык болбос. Элибиздин ынтымагы арта берсин. 

Кыйраган учак тууралуу маалыматтар жер жайнады. Кайсыл сайтка кирбе фото, видеолору чыгат. Бирок бул видеону сиз көрө электигиңизге кепилдик берем. Таланттуу кесиптешибиз Эмил Садыров ураган учактын жерге сүрүлгөн изин тартып келди. Эмесе көрүңүздөр. Көптөгөн суроолорго жооп дал ушул видеодо

Кыйраган учактан каза болгондордун толук тизмеси бул жакта

Чек ара маселеси чечилет. Кыргызстан менен Өзбекстандын өкмөттүк делегациялары чек ара маселелерин чечүү боюнча конструктивдүү иштерди улантууну макулдашты

Кыргызстан "күчтүү паспорт" рейтингинде 66-орунга татыса, Неймар дүйнөдөгү эң кымбат футболчу аталды.  

Бүгүн өлкөнүн көпчүлүк облустарын туман каптайт.

Валюта наркы. Бүгүн сомдун баасы долларга карата орто эсеп менен 69.40 (сатып алуу) жана 69.64 (сатуу) сомду түздү. 

Мунай баасы. Бишкекте орточо эсеп менен алганда Аи-92 үлгүсүндөгү май 39.40 сом, Аи-95 үлгүсүндөгү бензин 41 сом, ал эми дизель майы 36.00 сомдон сатылууда. 

Соңку сөз ордуна. Ынтымактан ашкан байлык жок. 

Жакшылыгыңызды тилеп Исмаил Мамытов.

Жаңылыктар түрмөгү
0