Амансызбы, бурадар? Өлкөдө саат 10:15. Ак калпакчан Далай Лама, ак көңүл селсаяк

© Sputnik / Табылды КадырбековДеятельность МП "Тазалык" в Бишкеке
Деятельность МП Тазалык в Бишкеке - Sputnik Кыргызстан
Жазылуу
Арыбаңыз, жакшы жатып жай турдуңузбу? Бүгүн күнгө шаршемби.

Бүгүн өлкө аймагы боюнча Баткен, Ош, Жалал-Абадда 13 градус жылуу болот экен. Ал эми Бишкек шаарында жамгыр жаашы күтүлөт деп билдирди Кыргызгидромет кызматы. Кыш дегенибиз менен декабрь айында жамгырдын жаашы акыркы учурда жаңылык болбой деле бараткандай…

Кыш демекчи, жаңы жылга бүгүн туптуура 24 күн калды. Бишкектин Энвер Гареев атындагы ботаникалык багында жаңы балаты базары ачылды. Андыктан азыртадан барып, ылайыктуусун чөнтөккө карап тандап алсаңыз болот. Өзгөчөлүгү, алар идишке отургузулган балатылар. Жаңы жылды майрамдап бүткөн соң, аны кайра корооңузга отургузуп койсоңуз болот. 

Ак калпакчан Далай Лама. Тибеттин руханий лидери Далай Лама "Манас" китебин белекке алып, ак калпак кийди. Кененирээк маалымат бул жерде

Селсаяк десе эле… Үйгө келе жатып эле капыстан чуңкурга түшүп кетип, бутуң сынып жаның көзүнө көрүнүп турат. Айланаңда жашоо өз калыбында жүрүп, поезддер шарактап жүрүп, автоунаалардын шуулдап өткөнү угулуп, бирок кыйкырган үнүң бир нече метр жердегилерге жетпей, ажал алкымдап турат… Бул көркөм чыгарма эмес, бул жакынкы күндөрү Бишкек шаарында болгон окуя… Кийинки күнү жабырлануучуну жылуулук өткөргөн түтүктөрдү паанектеген селсаяктар жер алдынан таап алып, тамак берип, Тез жардамды чакырып… акыры тиги жигитти 162 кызматынын куткаруучулары алып чыгыптыр… Андыктан, селсаяк десе эле секире бербей, адамга бир аз үңүлгөнгө үйрөнсөк

Өчпөс отко картошка бышырып жеген түркөйлөрдүн аныкталганын шаардык милициядан билдиришти.

Сасык тумоо желкелеп… Андан улам Кыргызстандагы 141 мектеп карантинге жабылды. Чоңдор кооптуу абал деп тынчсызданса, окуучулардын көбү үчүн "уре-ее, жыргализм, круто" деген эмоциялар менен коштолду. Бала да… Эх-ххх… балдар, балдар… 

Барымтага алынып. Эшек сатып соода менен шугулданам деп өзү "соодаланып" кеткен кишининин окуясына аргасыздан баш чайкайсың. Балээнин баары Балыкчыга келгенде башталыптыр. 

Азаматсың, Айгерим! Чехиянын Прага шаарындагы Банк институтунда окуп жаткан татынакай Айгерим Бирназарова аттуу мекендеш кызыбыз бар экен. "1000 евро стипендия алып, бай чехтердин катарындамын", — дейт тамашалай жылмайган Айгерим.

Баягы-ыы Марат. Россиядагы кыргыздар Москвадагы метродон аялды куткарып калган Марат Исаевди "жыл адамы" деп аташты

Ашказан кымбатпы же акчабы? Казак-орус чек арасы менен Россияга ашказанына катып 15 капсула героин алып бараткан 20 жаштагы бала кармалды. 

Валюта наркы. Бүгүн сомдун баасы долларга карата орто эсеп менен 69.17 (сатып алуу) жана 69.30 (сатуу) сомду түздү. 

Мунай баасы. Бишкекте орточо эсеп менен алганда Аи-92 үлгүсүндөгү май 36.80 сом, Аи-95 үлгүсүндөгү бензин 39.00 сом, ал эми дизель майы 35.80 сомдон сатылууда. 

Соңку сөз ордуна. Адамды кийиминен эмес, ишинен тааныйт.

Иш аптаңыздын ийгиликтүү өтүшүн каалап, Нургүл Максутова.

Жаңылыктар түрмөгү
0