05:42 21 Баш оона 2019
Түз эфир
  • USD69.8030
  • EUR77.3278
  • RUB1.0452
Троллейбустан чыгып бараткан киши. Архивдик сүрөт

Амансызбы, бурадар? Өлкөдө 10:15. Текебаевден Атамбаевге импичмент. Качкан карын эне

© Sputnik / Табылды Кадырбеков
Бурадар
Кыскача шилтеме алуу
237 0 0

Кутмандуу күнүңүздөр менен! Бүгүн күнгө шаршемби.

Эшикте күн чыкыроон тартып турат. Бүгүн кар жаабайт бирок, суук акырындап күчүнө кирип келе жатат. Шамал катуу болбогону менен, Бишкекте күндүзү 5, Ошто 3 градус суук болорун синоптиктер билдирди.

Чоңдорго кулак кагыш. Талас районундагы майып балдардын "Бекнур" реабилитациялык борборунан биртике отунунун жарымын жагып койгондуктан, отунсуз калчудай абалда турабыз деп айтышты. Алты саны аман чоңдордун-жетекчилердин ичинен шал оорусуна кабылган балдарга жардам көрсөтө турган бирөө-жарым чыгат болду бекен?

Азуулуу Текебаев ажо Атамбаевди алып түшөм дейби? Эшикте аба ырайы салкындаса, саясий айдыңда тескерисинче, башкача өңүт ала турган өңдөндү. Жогорку Кеңештеги "Ата Мекен" фракциясынын лидери Өмүрбек Текебаев президент Алмазбек Атамбаевге карата импичмент жарыялоо аракетин баштаганын жар салды. Ал келерки жылдын январь, февралында документтер топтолуп, импичмент жарыялоо үчүн укуктук факты базасы даярдаларын айтты.

Алтын жалатылган 6 миллиондук төш белгилер. Борбордук шайлоо комиссиясынын башчысы жергиликтүү кеңешке шайлана турган 7500гө чукул депутаттардын мандатын тастыктаган күбөлүгү менен төш белги бир нече миллиондорду чапчый турганын кадыресе көрүнүш катары карады. Алтын жалатылган төш белги ала турган тендерди токтотууга чыгарууга негиз жок деди. 

"Мырк" модага айланганы турат. Бир жумадан кийин Бишкекте "Мырк" брендинин алдында тигилген кийим-кече сатыла баштайт. Идеянын автору "мырк" деген сөзгө позитивдүү боёк сүртүп, атургай аны модага айланткысы келет

© Sputnik / Акылбек Батырбеков
Кар алдындагы Бишкектин асмандан көрүнүшү

Бийиктиктен карагандагы борбор калаа. Кар алдындагы Бишкектин асмандан көрүнүшү өзүнчө бир керемет. Бул жерде алаканга салгандай даана көрүнөт экен.

Боюн узартып эмне азап дейм да… Легендарлуу ортопед Сабырбек Жумабеков сүйгөнүнө жагыш үчүн боюн узарткан кыздар бар экендигин бизге берген маегинде айтып берди. Эмне азап дейм да, ага кетирген энергиясын башкага жумшаса болбойбу? Балким, мен түшүнбөстүрмүн… андай болсо, кечиресиздер.

Эмне дешти билбей турган жагдай. Суррогат эненин абалы. Карын эне чайналып, эми наристесин күн мурдатан сүйлөшкөндөй батирге алмашкысы келбей, жашырынып жашап жүрөт… Кимге эмне дейсиң да, кандай айтасың? 

Валюта наркы. Бүгүн сомдун баасы долларга карата орто эсеп менен 68.99 (сатып алуу) жана 69.15 (сатуу) сомду түздү. 

Мунай баасы. Бишкекте орточо эсеп менен алганда Аи-92 үлгүсүндөгү май 36.80 сом, Аи-95 үлгүсүндөгү бензин 39.00 сом, ал эми дизель майы 35.80 сомдон сатылууда. 

Соңку сөз ордуна. Эки доочу бир келсе, амалыңдын кеткени…

Куунак көңүл жана ачык маанай каалап, Нургүл Максутова

Белгилер:
карын эне, Бурадар, импичмент, валюта, Мунай, Өмүрбек Текебаев

ЭҢ МААНИЛҮҮ