Амансызбы, бурадар? Өлкөдө 10:15. Эрге эрте тийген кыздар, ЕАЭБди эңсеген картошка

Жазылуу
Кар жаады, кар жаады, бакыт жаады. Баарыңарды биринчи карыңар менен!

Секелек бойдон кетишти. Нарындын Ак-Талаа районунда 16 жана 17 жаштагы бир тууган кыздарын бир күндө күйөөгө берилиши катуу талкуу жаратты. Кыздардан атасы жуучу келгенде, бергенин айтат. Окуянын чоо-жайын бул жактан окуңуздар

Картөшкө. Кыргызстанда өстүрүлгөн картөшкө эмне себептен өлкө аймагынан чыга албай жатат? Буга адистер эмне дейт?  Таза абада, мөңгүнүн суусуна сугарылган соонун картөшкөнүн даамы чет элдиктерди кайдыгер калтырбайт эле да. 

Атамбаев кайда? Грузияда. Атамбаев 12-13-октябрда Грузияда расмий иш сапары менен болду. Коңшу менен болгон мамиле албетте жакшы, бирок башкаларга жагынам деп жатып, экинчилерин таарынтып албасак болду.

Чубактын кунундай чубалган соттор. Кечээ MegaCom компаниясынын иши боюнча бул ишкананын башкы директорунун мурдагы кеңешчиси Алмаз Абеков 25 жылга эркинен ажыратылды. Ал ортодо Ахматбек Келдибековдун ишин караган сот мурдагы инстанциялардын өкүмүн күчүндө калтырды. 2010-жылдан бери чубалып келе жаткан Бакиевдердин иши да бир жаңсыл болбой келет. КР Башкы прокуратурасы Курманбек Бакиевди Белоруссиянын түрмөсүнө отургузуп, калгандарын Кыргызстанга кайтарууну талап кылды.  

"Дельфинде" сүзүп жыргайбыз. Кылым курулушу атыккан Бишкектеги "Дельфин" бассейнинин оңдоо иштери аяктап, жакын арада ачылуу алдында турат. Эми жайы-кышы дебей эле бакадай ушул жайда чардап жыргайбыз, буюрса. 

Депутат кечирим сурады. ЖКдагы "Ата Мекен" фракциясынын депутаты Алмамбет Шыкмаматов парламенттеги жаш депутаттар чабал болуп жатат дей коем деп, жаш депутаттардын "чабуулуна" тушукту. Эл өкүлү улуулук кылып, бул айткан сөздөрү алар үчүн катуу тийген болсо кечирим сурады. Азыркы заманда жасаган иши үчүн кечирим сурагандар дээрлик жок. Бул жагынан алганда депутатта абийир бар экен.

Жаш балдардын мушташы. Интернетте кичинекей балдардын мушташы катуу талкуу жараткан болчу. Балдардын бирөөнүн апасы окуянын чоо-жайын айтып берди

Валюта наркы. Бүгүн сомдун баасы долларга карата орто эсеп менен 68.41 (сатып алуу) жана 68.55 (сатуу) сомду түздү. 

Мунай баасы. Бишкекте орточо эсеп менен алганда Аи-92 үлгүсүндөгү май 36.50 сом, Аи-95 үлгүсүндөгү бензин 39.00 сом, ал эми дизель майы 33 сомдон сатылууда.

Соңку сөз ордуна. Лапылдап жааган ак кар сыяктуу ар бирибиздин көңүлүбүз таза болсун. Расул Үсөналиев

Жаңылыктар түрмөгү
0