Жеңиштин шаңы. Рио Олимпиадасында коло медалга татыган Иззат Артыков бардык кыргызстандыктарды кубанычка бөлөдү. Анын жеңиши айрым жумушчуларды өзгөчө кадамдарга да түрттү. Мисалы, Бишкек мэриясынын кызматтары жасаган иштерин Иззаттын ийгилигине арнады. Ошондой эле социалдык тармактарда да Иззаттын ийгилигине кубанып, төбөсү көккө жеткендердин саны миңдеп саналат.
Кубанычка толгон сезим. 10-август жалаң гана Иззаттын ийгилигин даңктаган күн болду окшойт. Анын апасы Малика Касымова менен жубайы Айгерим Замирбекова дагы кубанычтары койнуна батпай турганын айтты. Айгерим Иззат менен баш кошкондон кийин ал бир жумадан соң эле машыгууларга кеткенин айтты. Спорт убакытты жана бекем тартипти талап кыларын келин жакшы түшүнөрүн айтат. 15 жылдан бери спорт дүйнөсүнө толугу менен сүңгүп кирген жолдошун колдоп турганын белгиледи. Ии баса, коло медалдын ээси жакында кырк жылкылуу болорун жубайы кубануу менен билдирди.
Ынтымактуу үй-бүлө болом десең жакшы укта. Чынында чоңойгон сайын уйкудан таттуу эч нерсе жок экенин сезе баштайсың. Окумуштуулар дал ушул уйку бактылуу жашоого кандай таасир берерин изилдептир. Болгондо дагы түгөйлөр ортосундагы мамилеге да таасир берерин далилдешти. Жыйынтыгында түндө уйкусу кана уктаган жубайлар өздөрүн бактылуу сезет имиш. Түндө телефонду, компьютерди тиктебей, көшүлүп уктоого шашкыла.
Билет алганды унутпагыла. 3-8-сентябрда Ысык-Көлдүн жээгинде Дүйнөлүк көчмөндөр оюндары болот. Ага билет алам деп ашыккандар Бишкек жана Ош шаарларынан сатып алса болот. Кыстарма үчүн айта кетчү нерсе — билеттин баасы азыр канча болору тактала элек. Андыктан көчмөндөрдүн оюндарын көрөм дегендер акчаңарды камдап, билет качан сатыкка чыгарын акмалап тургула.
Христиандарга кубаныч тартуулаган мусулман. Бул дүйнө жакшы адамдар бар үчүн эле сакталып тургандай таасир калтырат кээде. Анын ичинен кайрымдуу, күйүмдүү болуу да адамдарды айбандардан айырмалап турган сапат болсо керек. Россиянын Челябинск облусунун тургуну Галия Исекеева бош калган чиркөөнү сатып алып, аны жергиликтүү проваславдарга тартуу кылган. Галия башында чиркөөнүн имаратын дүкөн кылууну каалаган. Бирок чиркөөнүн бай тарыхы бар экенин билгенден кийин аны жергиликтүү элге белек кылды. Эл берилген белекти жапа тырмак оңдоп, саналуу күндөн кийин ал жакта сыйына башташат.
Валюта баасы. Бүгүн бир доллар 68.76 сом деп бааланды.
Мунай баасы. Бишкекте Аи-95 үлгүсүндөгү бензин 39 сом болуп кымбаттады. Ал эми Аи-92 үлгүсүндөгү май 36 сом, ал эми дизель майы дээрлик эки сомго кымбаттап 32 сомду түздү.
Соңку сөз ордуна. Жакшыга жанаш, жамандан адаш.
