БИШКЕК, 26-дек. — Sputnik. Кытайда сот тогуз жаштагы Чен Манды өлүм жазасына тартылган атасынын карызын төлөөгө милдеттендирди. Бул тууралуу South China Morning Post басылмасы жазды.
Кыздын атасы 2013-жылы аялын жана кайненесин өлтүргөнү үчүн дарга асылган. Кылмышка барардан бир аз мурун ал Хэнань провинциясындагы үйүн 84 миң долларга сатып, алган киши акчаны толугу менен төлөп берген. Кылмыш ишин тергөө башталганда сатылган мүлк камакка алынып, жаңы ээси аны тарттырып жиберген.
Бир нече жылдан соң батири, акчасы жок калган киши компенсация алуу үчүн сотко кайрылган. Натыйжада сот Манды каза тапкан атасынын карызына жоопкер деп тапкан. Томолой жетим акча бере албай калганда ага бир катар чектөөлөрдү коюшкан. Маселен, учакка отурууга, жогорку ылдамдыктагы поезд менен каттоого тыюу салышкан.
Бул тууралуу ЖМКлар байма-бай жазып, окуя резонанс жараткан. Сот кыздын үй-бүлөсүндөгү кайгыны эске алуу менен чечимин кайра карап чыгууга мажбур болгон. Жыйынтыгында ал кыздын "мураска" калган карызын жокко чыгарып, элден кечирим сураган.
