Быйыл жаз мезгилинде Түндүк — Түштүк альтернативдүү жолун колдонууга берүү пландалууда. Бул жол эгемен Кыргызстандын тарыхындагы эң узун, эң татаал курулуштагы жол болду окшойт. Анткени жалпы узундугу 430 чакырымдан ашса, өлкөдөгү эң узун тоннель дагы дал ушул жолдун алкагында курулду. Муну менен катар ири эстакадалык көпүрөлөр салынды. Жол ишке берилсе өлкөнүн экономикалык мүмкүнчүлүгүн кеңейтет. Анткени жүргүнчүлөрдү жана жүктөрдү ташууга оңтойлуу болуп, жол киренин арзандашы күтүлүүдө. Ошондой эле кендерге жана ГЭСтерге жетүүнү жеңилдетип, туризмди өнүктүрүүгө өбөлгө түзөрү айтылып келет.
Бүгүнкү “Спутниктен сүйлөйбүз” программасында дал ушул колдонууга берилгени жаткан Түндүк — Түштүк альтернативдүү жолу тууралуу сүйлөштүк. Биздин суроолорубузга Транспорт жана коммуникациялар министрлигине караштуу Азия өнүктүрүү банкынын долбоорлорун ишке ашыруу тобунун инженер-жолчусу Айбек Калмаматов жооп берди.