Молдокасымов: окумуштуулар кыргыздар тууралуу доор-доорго бөлүп изилдешүүдө

Кытайдын Ли Линь деген аскер башчысы "Манас" эпосундагы Алмамбет болуп калышы ыктымал. Бул тууралуу Кыяс Молдокасымов Sputnik Кыргызстан радиосуна маек куруп жатып билдирди.

Анын айтымында, кытай окумуштуулары менен жүргүзүлгөн изилдөөлөрдө кыргыздар тууралуу мурда тарыхта айтылбаган бир топ маалыматтар ачылууда.

"Тарыхчы Сыма Цян бетке айткан, ал тургай императордон да тартынбаган адам болгон экен. Ал учурунда император жек көргөн Ли Линь деген аскер башчысы тууралуу жазып, аны коргоп чыккан. Мындан улам өлүм жазасына тартылып, бирок жазасы жумшартылып беш жыл түрмөгө камалган. Мына ошол Сыма Цян коргогон Ли Линь кыргыздарга өтүп келип, бул жакта калып кеткендиги тууралуу маалыматтар бар. Учурда кытай окумуштуулары кыргыздар тууралуу доор-доорго бөлүп изилдешүүдө. Кара Кытай доору боюнча изилдеген Сунь Хао деген окумуштуу "Манас" эпосуна тийиштүү архивдик документтерди издеп жатат. Балким ошол доордон, балким андан мурун жашап өткөн Ли Линь аскер башчысы Алмамбет болуп калышы ыктымал деген божомолдор бар", — деди Молдокасымов.

Ошондой эле окумуштуу бул изилдөөлөр жыйынтыкталса кыргыз тарыхына чоң өзгөрүү кириши мүмкүн экенин кошумчалады.