Чолпонбаев: быйыл Бишкекте үч сейил бак колдонууга берилет

Быйыл Бишкекте үч сейил бак колдонууга берилет. Бул тууралуу Нурбек Чолпонбаев Sputnik Кыргызстан радиосунун "Ачык кеп" программасында маек куруп жатып билдирди.

Анын айтымында, алгачкы сейил бактын ачылышы ушул жылдын апрель айында болот.

"Союз тарагандан бери көптөгөн парктар каралбай калган. Ошол багыттагы иштерди калыбына келтирүү үчүн тынымсыз аракеттер көрүлүүдө. Өткөн жылы Манас проспекти менен Түштүк магистралдын кесилишиндеги 11 гектарлык "Ынтымак" сейил багы колдонууга берилген. Быйыл борбор калаада дагы үч паркты ишке берүү боюнча жумуштар жасалууда. Учурда "Баят" базары жактагы аянты 10,5 гектар Түлөбердиев атындагы сейил бактан таштандылар тазаланып, курулуш иштеринин 80 пайызы жыйынтыкталды. Аталган паркты ушул жылдын апрель айында колдонууга берели деп турабыз. Мындан тышкары, Манас проспектинде жайгашкан аянты 13,5 гектарды түзгөн "Сүйүү" паркы оңдолуп, "Ден соолук" деген ат менен  кайрадан ачылмакчы. Азыр сейил бактын жери таштандылардан тазаланып, курууга даярдалууда. Ошондой эле 8,5 гектар аянтты ээлеген "Ататүрк 2" аталышындагы сейил бакта иштер жүрүп жатат. Ал Токтоналиев көчөсү жана Түштүк магистралдын кесилишинде жайгашып, ушул жылдын июнь айында ачылат", — деди Чолпонбаев.

Ал, андан тышкары, шаарды көрктөндүрүү багытында борбор калаанын ар бир районунда 10дон чакырым жол курула турганын кошумчалады.