Жогорку Кеңештин депутаты Рыскелди Момбеков ар түрдүү маселелер талкууланып жатканда мамлекеттик акционердик коомдордун ишин тыкыр изилдеп чыгуу керектигин билдирди.
Анын айтымында, акционердик коомдордун директорлор кеңешине мүчөлөрдү азайтуу керек.
"Апрель айынын ортосунан аягына чейин жалпы Кыргызстан боюнча мамлекеттик акционердик коомдордун акционердик чогулуштары өтүп жатат. Эмне үчүн акционердик коомдун директорлор кеңешине бир эле жерге алты-жети киши дайындалууда, мен түшүнбөй жатам. Директорлор кеңешине барган кишилер айлык албайт дейт. Сиз ушуга ишенесизби? Мына Асель Союзбековна (Кодуранова – ред.) директорлор кеңешине мүчө болгон, квартал сайын айлык алчу, мен деле алчумун. Азыр булар биз албайбыз, баш тартабыз деп жатышпайбы. Айлыктан "отказ" берген, байлыктан баш тарткан кыргызды табыш кыйын го", — деген пикирин билдирди депутат.
Момбеков бюджет деген сөз кыргыздардын "бүт жейт" деген эле сөзүнөн алынса керек, "жегендин баары эле, дегендин баары эле ошол жактан чыгат" деди.
