Аскерде чогуу кызмат өтөгөндөр адам өлтүрүүгө шектелүүдө. Бул тууралуу Ош ОИИБдин маалымат катчысы Жеңиш Ашырбаев Sputnik Кыргызстан радиосуна маек куруп жатып кабарлады.
Анын айтымында, 11-август күнү саат 22:30дар чамасында Ноокаттын Ак-Терек айылынын Кескен-Бел аймагынан күч колдонулуп өлтүрүлгөн эркек кишинин сөөгү табылган. Ыкчам тергөөчүлөр ал буга чейин изделип жаткан Ош шаарынын Түштүк-Чыгыш кичи шаарчасынын 25 жаштагы жашоочусу экенин аныкташкан. Ал эми ага таандык Lexus IS200 үлгүдөгү унаасы Бишкектин Свердлов районундагы булгары заводунун жанындагы бак-дарактардын арасынан табылган.
"Аталган факты боюнча шектелип Балыкчы шаарынын 22 жаштагы жана Талас районунун 21 жаштагы тургундары кармалган. Алардын бири аскердеги милдетин декабрь айында өтөп бүтсө, экинчиси Ош шаарындагы аскер бөлүктүн биринде келишимдик негизде кызмат өтөп жаткан", — деди Ашырбаев.
Андан соң унааны айдап Бишкекке келишкен да, 26 жаштагы бөлөсүнөн сатып берүүнү суранган. Бирок ал макул болбогондуктан, унааны булгары заводдун жанына токтотуп кетишкен.
Учурда тергөө иштери жүрүп жатат.
