"Ата керээзи" тасмасы Африкада өткөн эл аралык кинофестивалда үч байгеге ээ болду. Бул туурасында картинанын режиссеру Бакыт Мукул Sputnik Кыргызстан радиосуна маек куруп жатып билдирди.
Кинотасма Түштүк Африкадагы конкурстун баш байгесине татыган. Андан сырткары, "Режиссердун мыкты иши", "Оператордун мыкты иши" коминациялары боюнча да жеңишке жеткен.
"Аталган кинофестивалда Орто Азиядан бир дагы тасма буга чейин байге алган эмес экен. Тарыхта биринчи жолу биздин тасма баш байге утуп алды. Биз билеттин кымбаттыгынан жана жолдун узактыгынан улам бара албай калганбыз", — деди режиссер.
Кинокартинанын режиссерлору — Бакыт Мукул, Дастан Жапар уулу, ал эми оператору — Акжол Бекболотов.
Эки саатка чукул созулган толук метраждуу "Ата керээзи" тасмасы "Кыргызфильм" жана "Элфильм" студияларында тартылып, башкы ролдордо Иман Мукул, Марат Алышпаев, Тынара Абдразаева, Бакыт Мукул жана башкалар ойногон.
