Жалал-Абад шаардык кеңешке кийинки шайлоо майдын аягына белгилениши мүмкүн. Бул тууралуу Sputnik Кыргызстан агенттигине Борбордук шайлоо комиссиясынын Жалал-Абад шаарындагы өкүлү Дамир Жүндүбаев билдирди.
Эске сала кетсек, үстүбүздөгү жылдын 30-март күнү Жалал-Абад шаардык кеңешинин депутаттары өзүн-өзү таркатуу боюнча чечим кабыл алган. Мыйзам боюнча эл өкүлдөрү президенттин жарлыгы чыкканда гана таркатылат.
"Кийинки кадамдар кандай болорун болжолдуу гана айтууга болот. Анткени шаардык кеңешти таратуу боюнча президенттин жарлыгы чыга элек. Шайлоонун күнү ошондо гана так аныкталат. Бирок өзүңүздөр билгендей өлкө боюнча 21 жергиликтүү кеңешке шайлоо 28-майга белгиленди. Жалал-Абад шаардык кеңешке да шайлоо ошондо өтүшү ыктымал", — деди ал.
Жүндүбаев акыркы чечим БШК тарабынан кабыл алынарын кошумчалады.