БИШКЕК, 22-мар. — Sputnik. Кыргызстанда 22-мартта коронавирус жуктургандар катталган жок. Бул туурасында Республикалык штаб билдирди.
Өлкө боюнча COVID-2019 вирусуна кабылгандардын саны - 14. Анын алтоосу эркек болсо, сегизи аял. Баткен облусунда бирөө, Сузак районунда сегиз адам, Ноокат району боюнча үч, Бишкек шаарында эки адам бар.
Бейтаптардын жаш курактары 25 жаштан 80 жашка чейинкилер, бардыгы тиешелүү дарылануудан өтүүдө. Алар менен байланышта болгон адамдардын саны 2628 болду.
Штаб учурда эпидемияга каршы жана профилактикалык иш-чаралар уланып жатканын кошумчалады.
Коронавирус Кыргызстанда
Кыргызстанда 18-мартта коронавирус биринчи жолу Сауд Аравиядан кичи ажылыктан келген үч адамга жукканы аныкталган. Үчөө тең Жалал-Абад облусуна караштуу Сузак районунун тургундары. Алар менен кошо 12-мартта бир каттамда Бишкекке 144 адам келген. Анын экөө Өзбекстанга кетип, калган 142си изоляцияга алынган.
21-мартта дагы Сузактын беш, Бишкектин эки, Баткендин бир тургунунан COVID-19 аныкталды.
Акыркы маалыматтар боюнча, вирус жуктуруп алгандардын жалпы саны 14кө жетти.
Мындан улам өкмөт 22-марттан баштап Кыргызстандын аймагына өзгөчө кырдаал жарыялады.
