Кыргызстанда диабетке каршы күрөшүү жумалыгы башталды

БИШКЕК, 13-ноя. — Sputnik. Кыргызстанда бүгүнтөн тарта 21-ноябрга чейин диабетке каршы күрөшүү жумалыгы башталып, республика аймагында бир катар иш-чаралар өтөт. Бул туурасында уюштуруучулар кабарлашты.

Анда коомчулуктун, өкмөттүн көңүлүн кант диабетине буруу, элди маалымдар кылуу жана оорунун кесепети туурасында айтып берүү максаты каралган.

Бул жумалыктын алкагында диабет менен ооруган балдар үчүн көңүл ачкан спорттук иш-чаралар, улгайгандар үчүн спорттук флеш-моб өтөт. Андан сырткары, каалаган адам артериалдык кан басымын жана кандын деңгээлин бекер текшерте алат. Дарыгерлердин атайын конференциясы уюштурулуп, "Кыргызстандагы кант диабети: көйгөйлөр жана аны чечүүнүн жолдору" деп аталган тегерек стол болот.

Расмий маалыматтарга таянсак, Кыргызстанда 2017-жылы диабеттен жабыркаган 55 миң бейтап катталган. Диабет боюнча эл аралык федерациянын божомолуна караганда, Кыргызстанда бул илдеттин таралуу деңгээли 20 жаштан 79 жашка чейин болуп, 2025-жылы 5,8 пайызды түзөт.

Дүйнө боюнча диабеттен жабыр тарткандардын саны 422 миллион болсо, 2025-жылы 550 миллион адамга жетээри айтылууда. Ал эми 2035-жылы алардын саны 600 миллионду чапчыйт дешти.