08:04 23 Жетинин айы 2019
Түз эфир
  • USD69.8500
  • EUR77.3135
  • RUB1.0964
Унааны уурдап жаткан адам. Архив

Унааны көз көрүнөө айдай качкандардын 5 окуясы

© Sputnik / Константин Чалабов
Кыргызстанда
Кыскача шилтеме алуу
28210

Уурдалып кеткен унаалардын дээрлик баарын укук коргоо органдары таап, ээлерине кайтарып берген.

Sputnik Кыргызстан агенттиги бир жыл ичиндеги республика аймагында бирөөнүн унаасын айдай качкандар жөнүндө эң оңтойсуз, күлкүлүү окуяларын тизмектеп чыкты. 

Бешинчи орунда — каратып туруп унаасын алдырып ийген бишкектик таксисттин окуясы. 

Кардар такси чакыртып, "Манас" аэропортуна жеткирип коюну суранган. Келген таксистти мейманканада бир аз күтүп турууну өтүнгөн. Аңгыча кардар таксисттен алдоо жолу менен унаа ачкычын алып, качып кетүүгө үлгүрүп, бирок кийин колго түшкөн. 

Төртүнчү орунда – бишкектик кардар жолтандабас сатып алаар алдында унааны бир аз айдап, текшерип көрүүнү чечет. Анан эмне, миллион сомго текшербей эле алып алмак беле? Lexus GX470тин рулуна отурган бойдон качып жөнөгөн жаран бат эле тутулду. 

Үчүнчү орунда "Ак-Ордо" жаңы конушуна уурулукка барып, урушуп кеткен эргулдардын окуясы турат. Унаанын аккумуляторун чечип алууну көздөгөн балдар өз ара уруша кетип, чатакташып жатканда ары-бери өткөндөр милиция чакырып коюшат. Жыйынтыгында бирөө колго түшүп, калган төрт өнөктөшү жөнүндө төкпөй-чачпай баарын айтып берген. Ошол эле топ мурда бир нече унаа уурдаганын мойнуна алган. 

Экинчи орунда – Ошто таксиге отуруудан эриккен кыз. Коомдук транспортту колдонбой, жол жээгинде турган Mercedes Benz унаасын айдай качкан. Кызыгы, 24 жаштагы кыз кармалгандан кийин уурдап алган машинага өзүнүкүндөй кылып, кылдат мамиле кылганын айтып берген. 

Биринчи орунду алган окуя уурулук болсо дагы уккандарга өтө позитивдүү маанай туртуулаган. "Көк-Жар" жаңы конушундагы үйлөрдүн биринин дарбазасында эшиги ачык турган унааны көргөн адам аны айдап кетүүнү чечет. Ал рулга отурат да, Шабдан баатыр көчөсүнө чыгып, зуулдап жөнөйт. Бир маалда арткы орундуктан "байке, акырыныраак айдаңыз" деген кичине баланын үнү угулат

Рулдагы киши чочуп кетет да, унааны башкара албай калып, жол жээгиндеги арыкка түшүп кеткен. Кийин унаадан түшүп, изин сууткан. Ал эми унаадагы бала социалдык тармактардын "баатыры" болуп чыга келген.

Макаланын аягында айдоочуларга темир тулпарын колдон алдырып ийбөөнүн амалынан эске сала кетели. 

  • Эч качан унаанын эшигин бекитпей жана ачкычын ичине калтырып кетпеңиз. 
  • Унааны киши аз жана жарык берилбеген аймактарга узак мөөнөткө таштабаңыз. 
  • Түнкүсүн машинаны гаражга же акы төлөөчү унаа токтотуучу жайларга токтотуңуз. 
  • Уруунун айласын кетириңиз, мисалы, сигнализация же рулду убактылуу иштетпей кое турган ыкмаларды пайдаланыңыз. 
  • Унаанын салонунда документ жана баалуу буюмдарыңызды таштап кетпеңиз.
  • Унаа сатып аларда комплектиде эки ачкыч болушу керек. 

Унааңыздын уурдап кетишкенин билсеңиз, дароо 102ге чалып, милиция кызматкерлерине кабарлаңыз.

Тема боюнча

Таксисттин унаасын көз көрүнөө айдай качкандар кармалды
"Кардар" ээсинин көзүнчө Lexus GX470 унаасын айдай качты
Белгилер:
унаа, уурулук, айдоочу, Ош, Бишкек

ЭҢ МААНИЛҮҮ