БИШКЕК, 6-апр. — Sputnik. Алдыдагы 3-4 күндө аба ырайы кескин өзгөрүп, үшүк жүрөрүн Кыргызгидромет билдирди.
8-9-10-апрелде өлкө аймагынын көпчүлүк аймактарында жааган жаан карга айланып, бир катар дыйканчылык аймактарда үшүк жүрөт. Белгиленген күндөрү Чүй, Талас, Баткен, Ош, Жалал-Абад облустарында көпчүлүк аймактарында жаан жаайт. Тоо этектеринде жааган жаан карга айланса, тоолуу аймактарга кар түшөт. Кээ бир райондордо батыштан соккон шамалдын ылдамдыгы секундасына 17-22 метрге чейин жетет.
Мындай үшүк бүчүр байлаган, гүлдөгөн жана түйүлгөн данектүү мөмө бактарга коркунуч алып келет. Ошондой эле айыл чарба иштерин, автоунаа, энергетика жана коммуналдык кызматтардын ишин, кыштоодо мал кармоону кыйындатат.
