Кыргызстанга арналган алтын телефон жарык көрдү

© Sputnik / Владимир Астапкович / Медиабанкка өтүүiPhone телефону. Архив
iPhone телефону. Архив - Sputnik Кыргызстан
Жазылуу
Телефондун кымбат баалуу жасалгасы Кыргызстандын кайталангыс жаратылышы жана улуу маданиятынын таасири алдында иштелип чыккан.

БИШКЕК, 29-июнь — Sputnik. Жаңы чыккан Caviar Atlante Kyrgyzstan телефону Кыргызстанга арналганын, жасалгасы мамлекеттин маданий жана тарыхый мурастарынын негизги белгилерин камтый турганын компаниянын маалымат кызматы билдирди.

Apple iPhone смартфондорун зергер модификациялары менен жасалгалап келген Caviar бренди дүйнө мамлекеттерине арналган Atlante коллекциясын кеңейтип, Кыргызстанга арналган телефондун жасалгасын иштеп чыккан.

Маалыматка ылайык, телефондун кымбат баалуу жасалгасы Кыргызстандын кайталангыс жаратылышы жана улуу маданиятынын таасири алдында чыгарылган. 

"Алтын панелдин ортосунда кыргыз боз үйүнүн түндүгү чагылдырылган 40 нурлуу диск жайгашкан. Эки элемент тең абдан таасирлүү — бири тынчтык, байлыкты билдирсе, экинчиси мекендин, туулган жердин кымбаттыгын ырастап турат. Андан жогорураак Кыргызстандын герби жайгашкан. Намыстуу, эркиндикти баалаган ак шумкардын элесинин артында ак мөңгүлүү Ала-Тоо менен курчалган кереметтүү Ысык-Көл чагылдырылган. Композицияны кыргыз оюусу толуктап турат. Корпустун төмөн жагында мамлекеттик гимндин саптары чегерилген", — деп айтылат билдирүүдө.

Кооздуктун ар бир элементи кол менен жасалганы айтылууда. Буга чейин компания Россия, Казакстан, Азербайжан мамлекеттерине арналган жана Путин менен Назарбаевдин сүрөтү түшүрүлгөн телефондорду чыгарганы белгилүү.

Жаңылыктар түрмөгү
0