21:38 17 Теке 2018
Түз эфир
  • USD68.1634
  • EUR80.0375
  • RUB1.0917
Афганистандын жашоочулары. Архив

Кыргызстандагы качкын Сина: Кабулдагы күндөрдү эстесем, азыр да кыйналам

© Sputnik / Александр Гращенков
Кыргызстанда
Кыскача шилтеме алуу
12730

20-июнь — качкындардын бүткүл дүйнөлүк күнү. Расмий маалыматтарга ылайык, учурда Кыргызстандын аймагындагы качкындардын саны 175 адам, анын ичинен Афганистандан 112, башка өлкөлөрдөн келгендер 63 киши.

БИШКЕК, 20-июнь — Sputnik. Бул күнгө карата биз төрт баласын жетелеп, күйөөсү менен Бишкекке качып келип, качкын статусунда жашап жаткан Сина Мазлюмини кепке тарттык.

Беш баланын энеси, кабулдук бул аялга Кыргызстанда жашоону тагдыр Афганистандагы согуштан улам буюруптур. 

Биздин маңдайыбызга сүйлөгөндөн тартынып турган, сулууча келген маектешибиз азыр 36 жашта, балдарынын эң кенжеси Кыргызстанга келгенден кийин төрөлгөн, учурда беш баласын өзү жалгыз багып жатат. Сина Мазлюми менен жолугуп, сүйлөшүүбүзгө БУУнун Кыргызстандагы Качкындар боюнча Жогорку комиссарынын кызматкери Айнагүл Абдрахманова көмөк көрсөттү. 

Адегенде Афганистандан бул жакка кантип келип калгандыгын сурадык. 

"Кабулдагы ал күндөрдү эстесем, азыр да кыйналып кетем. Согуштун айынан ата-энем менен алгач, Пакистанга качканбыз, ал жерден мени 16 жашымда күйөөгө беришти. Анан абал тынчып, кайрадан Кабулда жашап калдык, ал эми күйөөм Кыргызстанга иштегени кетти", — деп эскерет Мазюми. 

Күйөөсү Кыргызстанда иштеп жүрүп, Афганистанга кайткандан тарта жергиликтүү укук коргоо органдары "орустарга иштеп жүрөсүң" деген шек менен кысымга алыптыр. Аны камаганга чейин баргандыктан, кайрадан өлкөдөн чыгып кетүүгө аргасыз болгон. Сина Кабулда ата-энесинин жардамы менен улам бир үйгө жашынып отуруп, акыры төрт баласы менен "кайдасың, Кыргызстан" деп жолдошу чакырган бейтааныш өлкөгө жөнөгөн.

"Келген күндөрүбүз оор болду. Бул жерден төрөлгөн эң кичүү уулума же документ ала албайбыз. Же жумуш жок. Бирок турмуш акырындап өз нугуна түшө баштады. Качкын статусун алып, укуктук маселелерибизди чечкенге БУУнун Кыргызстандагы качкындар боюнча уюму жакшы жардамын берди. Анан күйөөм жакшынакай жашап жүрүп эле, кийин башка аялга үйлөнүп кетти. Азыр каякта экенин деле билбейм, кыязы, Россияга кетсе керек", — деди ал муңайып.

Учурда Сина Бишкек шаарындагы кийим тигүү цехтеринин биринде тигүүчү болуп иштеп, беш баласын багып, батир акысын, балдарынын мектебин, бала бакчасын төлөйт. Ага "Дордой" базарында соода кылган жыйырма жаштагы уулу жардамчы. 

Биз эки өлкөнү салыштырып, кайсынысында жашоо сизге ыңгайлуу деген сурообузга, көздөрүн бакырайтып, таңгалган түрдө "албетте, Кыргызстан" деп жооп берди.

"Мен Афганистанда жашасам, ушинтип ээн-эркин иштемек эмесмин. Сиз билбейсиз, ал жакта аялдардын жашоо шарты таптакыр башка. Бул жерде жакшы, эркиндик бар. Кыргызстан меймандос, ачык, жакшы өлкө. Мен ушул жерге баш калкалап, балдарым менен жашоомду өткөрүп жатам. Бирок беш баланы жалгыз багыш кыйын, чынын айтсам, абдан кыйналып кеттим. Мени жубатканы — балдарымдын акылдуу жана тартиптүү болуп чыкканы ", — дейт Сина. 

Биздин маектеш көздөрүн жашылдантып, оор улутунуп алды. Анткен менен, ал жакшы адамдар бар экендигине ишенет. Сина өзү иштеген тигүү цехинин жетекчиси жана кесиптештери ага аяр мамиле кыларын, зарыл учурда колунан келген жардамдарын көрсөтүшөрүн кошумчалады.

Тема боюнча

Бейшенов: Памир кыргыздарынын көйгөйлөрүн Афган өкмөтү менен сүйлөшүп чечмей болдук
Афган кыргыздарына үзгүлтүксүз жардам берүү маселеси талкууланат
Белгилер:
качкындар, качкындардын дүйнөлүк күнү, Айнагүл Абдрахманова, Сина Мазлюми
Колдонуу эрежелериПикирлер

ЭҢ МААНИЛҮҮ