БИШКЕК, 7-май — Sputnik. Премьер-министр Темир Сариев Ош облусуна жана Ош шаарына бир күндүк иш сапар менен кеткенин өкмөттүн маалымат кызматы билдирди.
Сапардын жүрүшүндө премьер-министр "Достук" көзөмөлдөө-өткөрүү пунктунун иши менен таанышып, Ош облусунун Араван районундагы жазгы талаа жумуштарынын жүрүшүн көзөмөлдөйт.
Ошондой эле, премьер Кара-Суу районунда Улуу Ата мекендик согуштагы Жеңиштин 70 жылдыгына арналган салтанаттуу иш-чарага катышып, согуш ардагерлерин куттуктайт. Андан сырткары Ош шаарындагы "Өчпөс от" мемориалдык комплексине гүлчамбар коюу аземине катышуусу пландалууда.
Иш сапардын алкагында премьер-министрдин төрагалыгы алдында Ош шаарында жазгы талаа өнөктүгүн өткөрүү маселесине арналган селектордук жыйын өтөт.
