Атамбаев жол кайгуул кызматынын кызматкерлеринин үстүнөн кылмыш ишин козгоону тапшырганын айтты

Жазылуу
ИИМдин жетекчилиги президент буйрук бергенге чейин окуя боюнча тийиштүү аракеттерди көрүшү керек болчу деди Атамбаев.

БИШКЕК, 21-июль — Sputnik. Президент пара талап кылган Жол кайгуул кызматынын инспекторлоруна карата кылмыш ишин козгоо боюнча УКМКнын коррупцияга каршы кызматына буйрук бергенин президенттин маалымат кызматы билдирди.

Кылмыш иш папкасы. Архив - Sputnik Кыргызстан
Видеодо түшкөн инспекторлорго жана алардын жанында жүргөндөргө кылмыш иш козголду
30-июнь күнү социалдык тармактарда ЖКК инспекторлорунун үч жүргүнчүсү бар унааны токтоткону тартылган видео жайгаштырылган. Инспектордун пара талап кылып жаткан жерин Болот Ибрагимов тартып алган. Жүргүнчүлөр кызматкерлердин документтерин сурашкан. Инспекторлордун жанында турган жарандар кийлигишип, араздашып кетишкен. Андан соң видеону алыш үчүн инспекторлор машинанын артынан кууп, мамлекеттик номерин жулуп алышкан.

КР ИИМдин атайын даярдыктагы полкунун кызматтык базасынын ачылышында, Атамбаев элдин милицияга болгон ишенимин жогорулатуу керектигин айтты. Ошол эле учурда акыркы кездери милицияга карата коомдо терс пикирлер жаралып жатканын кошумчалады. 

"Акыркы бир учурду эле алсак, Жол кайгуул кызматынын инспектору ачык эле пара талап кылып атат. ИИМдин кызматкерлери өздөрүнө талапты жогорулатышы керек. Чынын айтсам, УКМКнын коррупцияга каршы күрөшүү кызматына силердин кызматкерлерге карата кылмыш ишин козгоп, керектүү чараларды көрүү боюнча буйрукту мен бергем. ИИМдин жетекчилиги президент буйрук бергенге чейин эле окуя боюнча тийиштүү аракеттерди көрүшү керек болчу. Бул нерсе бир карын майды бир кумалак чирите турганын көрсөтүп турат", — деди Атамбаев.

Ал ошондой эле, паракор болуп кеткен ИИМдин Жол кайгуул кызматынын инспекторлоруна карата катуу чара көрүлүшү керектигин баса белгиледи.

Жаңылыктар түрмөгү
0
Алгач жаңыларыАлгач эскилери
loader