БИШКЕК, 25-ноя. — Sputnik. Австралиянын премьер-министри Малкольм Тернбулл сириялыктарга гуманитардык жардам катары дагы 220 миллион Австралия долларын бөлүүнү пландап жатканын билдирди. Аталган сумма АКШнын доллары менен алганда 160 миллион долларды түзөт. Бул тууралуу Ассошиэйтид Пресс агенттигине шилтеме кылып РИА Новости билдирди.
Агенттик белгилегендей, Австралиянын бийлиги кризистен жабыркаган сириялыктар үчүн 2011-жылдан бери 213 миллион доллар которгон.
Сирияда куралдуу согуш 2011-жылдын март айынан бери уланууда. Өкмөттүк аскерлерге каршы ар түрдүү куралдуу түзүмдөрдүн согушкерлери туруп жатат. Россия Сириянын президенти Башар Асаддын өтүнүчү менен 2015-жылдын 30-сентябрынан бери аскердик жардам берип, Сириядагы террористтердин аймактарына авиа соккуларды баштаган.
