БИШКЕК, 7-июл. – Sputnik. Нигериялык 36 жаштагы качкын Эммануэль Киди Намди бейшембинин түнүндө италиялык Фермо шаарындагы футболдун жергиликтүү фанатынын келтегинен каза болду.
Басылмалардын жазганына караганда, кеч курун Эммануэль 24 жаштагы аялы Киниери менен шаардын борборуна сейилдегени чыккан. Күтүүсүздөн пайда болгон жергиликтүү фанат аялды кемсинтип, "африкалык маймыл" деп мазактай баштаган. Ыза болгон Эммануэль беркиге "жооп кайтарган". Африкалыктан алда канча күчтүүрөөк болгон фанат аны жарым жан кылып сабап салган. Качкын ооруканага жеткирилгенден кийин көп өтпөй, эсине келбеген тейде көз жумган.
Бул аял-күйөөнүн таалайсыз тагдыры туурасында басылмалар дароо жазып чыкты.
Аталган аймактагы коомчулуктун башчысы Виничио Албанези бул окуяны "салкын кандуу провокация" деп атады.
Нигериялык мигранттын Фермодогу өлүмү учурда Италия коомчулугунда кызуу талкууга алынып жаткан чак.
Бир катар басылмалар Италия премьер-министри Маттео Ренцинин кечээ Албанезиге чалып, бул окуя жана жалпы жагдай боюнча сүйлөшкөндүгүн жазды. Италиянын тышкы иштер министри Анжелино Алфано коомдук тартип жана коопсуздук боюнча провинциалдык комитеттин жыйынын өткөрөрүн айтты.
