Бишкек шаарында окуган жүздөгөн студенттер кар менен чабышып көңүлдөрүн көтөрдү
Бишкекте Кыргыз-Түрк "Манас" университетинин студенттери кыштын суугуна карабай маанайларын кар чабышып көтөрүштү.
Иш чараны уюштуруучулардын бири Өмүрбек Идрисовдун айтымында, мындай иш чараны уюштуруу биринчи кар жааганда оюна келген.
"Балалык күндөрдү досторубуз менен дайыма ойногон күндөр эсиме түштү. Ошол учурду бир эстегибиз келди", — деди ал.
Кар менен чабышып көңүл ачууга башка жогорку окуу жайлардын жүзгө жакын студенттери келген.
"Эреже боюнча карды катуу кылып тоголоктобоо керек болчу. Себеби арабызда кыздар да бар. Мындай көңүл ачуу студенттердин мамилесин бекемдейт деп ишенем", — деди Идрисов.
Эгер бул иш чара жакшы болсо дагы уюштурууну пландап жатышат. Башкысы аба ырайы гана ыңгайлуу болушу керек.
Бишкектеги жогорку окуу жайлардын студенттери арасында кар чабышуу биринчи жолу болуп жатат. Окуу жайлар жана студенттер арасындагы мамилени чыңдоо максатында уюштуруучулар мындай иш чараны жыл сайын өткөрүп турууну пландап жатышат.
