ЧОЛПОН-АТА, 5-сен. — Sputnik. Өзбекстандык балбан Данияр Абдрахимов өз жеңишин көзү өткөн президент Ислам Каримовго арнай турганын Sputnik Кыргызстан агенттигинин кабарчысына билдирди.
Абдрахимов 90 килограмм салмакка чейинки категорияда күч сынашат. Өзбекстандын командасында 14 спортчу бар. Алар Каримовдун каза болгондугу тууралуу кабарды уккандан кийин аза күткөндүктөн оюндун ачылыш аземине катышкан эмес.
"Биз үчүн бул күтүүсүз кабар болду. Кетип жатканда мындай болуп кетет деп эч ойлогон эмеспиз. Бирок спорт деген спорт. Эми биз бардык жеңишибизди биринчи президентибиз Ислам Каримовго арнайбыз", — дейт өзбекстандык балбан.
Ал ошондой эле башка спортчулар аларды моралдык жактан шыктандырып жатканын кошумчалады.
"Бул жерде бардыгы жакшы, уюштуруу иштери жана машыга турчу жайлар ойдогудай. Эл абдан меймандос экен. Биз аябай жакшы мамилеге туш болдук", — дейт спортчу.
Ал Ысык-Көлдүн сулуулугу, Кыргызстандын көз жоосун алган жаратылышы арбап алганын жашырган жок.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
