БИШКЕК, 22-сен. — Sputnik. Кыргызстандын курама командасы эмдиги жылы Иранда өтө турган грек-рим күрөшү боюнча Дүйнө кубогуна биринчи ирет катыша турганын машыктыруучу Канат Бегалиев билдирди.
Анын айтымында, улуттук команда Лас-Вегаста өткөн дүйнө чемпионатынын жыйынтыгы менен ааламдагы мыкты сегиз команданын катарына кире алды.
"Кыйын деген өлкөлөрдү артка калтыра алдык. Сегизинчи орун бизге абройлуу мелдештерге катышууга мүмкүндүк берет", — деди Бегалиев.
Башкы машыктыруучу Олимпиада оюндарына чейин дагы үч лицензиялык турнир өтөрүн, ага кыргызстандык команда даярдык көрө баштаганын белгиледи.
Дүйнө чемпионатында Кыргызстан үчүн лицензияны грек-рим күрөшү боюнча Арсен Эралиев утуп алды. Жалпы жонунан бүгүнкү күндө Кыргызстан 2016-жылы Рио-де-Жанейродо өтө турган Олимпиада оюндарына катышуу үчүн төрт лицензияга ээ болду.
