БИШКЕК, 17-янв. — Sputnik. Жума күнү, 20-январда учак кырсыгынан каза болгондорго багышталып өлкө боюнча куран окулат. Тиешелүү буйрукка муфтий Максатбек ажы Токтомушев кол койгонун Кыргызстан мусулмандар дин башкармалыгы билдирди.
Буйрукка ылайык, өлкө аймагындагы ар бир мечитте мамлекетибиздин тынчтыгы, элибиздин саламаттыгы жана кырсыктан көз жумган мекендештерибизге арналып Куран окулуп, дуба тилектер айтылат.
Муну менен катар республиканын бардык аймагындагы жума намаз окулган мечиттерде кырсыктан жабыркагандарга материалдык жардам көрсөтүү максатында атайын кутучалар орнотулат. Топтолгон каражат атайын ачылган эсепке чегерилет.
Дүйшөмбү күнү саат 7.30да "Манас" аэропортунун жанына Гонконгдон Стамбулга учуп бараткан Boeing-747 учагы кулаган. Ал Бишкекке май куюп алуу үчүн токтомок. Кыйроонун себептери аныкталууда.