БИШКЕК, 16-дек. — Sputnik. Кыргызстанда боз үй формасындагы Nomad Greenhouse аттуу күнөскана калың элге көрсөтүлө турганын авторлор билдирди.
Бул күнөскана Тилек Токтогазиевдин атвордук долбоору болуп саналып, дүйнөдө ага окшош күнөскана жок.
Анын айтымында, күнөскана бизнеси жаатындагы төрт жылдык тажрыйба жаңы формадагы күнөскананы иштеп чыгууга шык берген.
"Учурда Кыргызстанда колдонулуп жаткан күнөсканалардын көбү чет жакта жасалган. Алар биздин климаттык шартка туура келбегендиктен кошумча нерселерин жасоого туура келет. Анан калса курулушу да оор жана кымбат", — деди автор.
"Тааныштыруу учурунда катышуучуларга күнөскананын өзгөчөлүктөрү жана ыңгайлуулуктары дагы айтылат. Ошондой эле кызыктырган суроолорду авторлордун өзүлөрүнө берип, жооп алууга толук мүмкүнчүлүк болот", — деп айтылат билдирүүдө.
Демилгечилердин айтымында, алар ойлоп тапкан күнөскананы курууга аз каражат кетет.
