БИШКЕК, 29-окт. — Sputnik. Жалал-Абадда милиция кызматкерлеринин арасында "Атам, апам жана мен. Биз — спорттук үй-бүлө" аталышындагы спорттук иш-чара уюштурулду. Бул тууралуу Sputnik Кыргызстан агенттигинин кабарчысы жеринен билдирди.
Спорттук иш-чара кыргыз милициясынын 92 жылдыгына карата уюштурулуп, облус аймагындагы милиция кызматкерлеринин үй-бүлөлөрү спорттун түрлөрү боюнча күч сынашты. Анда үч адамдан турган командалар (күйөөсү, аялы жана баласы) катышты.
"Мелдешке облустук ички иштер башкармалыгын борбордук аппараты, Жалал-Абад ШИИБ, Сузак, Базар-Когон, Ноокен, Майлуу-Суу, Таш-Көмүр, Кара-Көл, Токтогул, Аксы, Ала-Бука, жана Чаткал райондорунун келген командалар катышты. Командалардын өзгөчөлүгү андагы мүчөлөр бир үй-бүлө болушу керек", — деп жазылат маалыматта.
Спорттук эстафета кап кийип секирип жарышуу, баскетбол тобун коштоп чуркоо, тапанча чачып, кайра куроо, аркан тартышуу боюнча өттү. Андан сырткары милиция кызматкерлеринин балдарынын сүрөт көргөзмөсү уюштурулду.
Жыйынтыгында 1-орунду Таш-Көмүр, 2-орунду Ноокен, 3-орунду Борбордук аппарат жана Кара-Көл шаардык ИИБдин командасы ээледи.
