БИШКЕК, 6-окт. — Sputnik. Социалдык тармакка чыккан эки жеткинчектин мушташып жаткан видеосуна Ички иштер министрлиги блок койгону менен ал интернет айдыңына кайрадан таркап баштагынын ИИМдин маалымат кызматынан кабарлашты.
Буга чейин 7-8 жаштагы балдар чоң адамдардын сүрөөнү менен мушташып жаткан видео социалдык тармакка жайылып кеткен. Эки бала бети-башынын канжалаганына карабастан мушташууну улантышкан.
"Зомбулук камтылган видеону сайттардан алдырып салганбыз. Бирок айрымдар видеону жүктөп алганга жетишиптир. Алар интернетке кайрадан жайылтып жатышат", — деп билдирди маалымат кызматындагылар.
ИИМ аталган видео боюнча текшерүү иштери жүрүп жатканын белгиледи.
