БИШКЕК, 22-сен. — Sputnik. Октябрь айынан тарта борбор калаадагы "Айчүрөк" дүр-дүйнө дүкөнүн кеңейтүү аракеттери башталат. Азыркы имараттын жанына кошумча курулуштар салынып, көп кабаттуу унаа токтотуучу жай да курулат.
"Айчүрөк" дүр-дүйнө дүкөнүнүн башкы директору Михаил Михин жаңы курулуштун аянты канча болору такталып жатканын айтат. Ал үчүн ЦУМдун жанындагы чакан базарды жылдыруу керек. Бир айдан кийин жерди казып, жаңы имараттын пайдубалын түптөөгө аракеттер көрүлөт.
Жалпысынан алты кабат боло турчу имаратта супермаркет, кинотеатр жана көңүл ачуучу жайлар жайгашат.
Пландалган жаңы курулуш 2018-жылы аяктайт.
Чакан базарда соода кылгандарга азыркы ЦУМдун имаратынын бешинчи кабатынан жеңилдетилген шарт менен атайын орундар берилет.
"Октябрда алар менен болгон келишим аяктайт. Курулуш иштеринен улам сатуучулар менен келишим узартылбайт. Эгер товарларын толугу менен сатууну кааласа имараттын бешинчи кабатынан жер беребиз. Бир аздан кийин суук дагы түшөт", — дейт Михаил Михин.
Ал ошондой эле курулуш иштери ЦУМдун жанындагы паркка эч кандай таасир бербей турганын айтты.
