БИШКЕК, 9-сен. — Sputnik. КР Акыйкатчысы Кубат Оторбаев кыргыз-казак чек арасындагы "Кордай" көзөмөл-өткөрүү пунктун текшерип келгенин Омбудсмен институтунун маалымат кызматы билдирди.
Кийин Казакстандын Акыйкатчысы өлкөнүн тийиштүү органдарына чек арадан адамдардын өтүүсү үчүн ачылган коридорлорду алардын ээн-эркин өтүшү үчүн кеңейтүүнү тапшырган. Андан сырткары талапка жооп берген күтүү жайларын түзүү зарылдыгы айтылган. Учурда иштер башталды.
8-сентябрда Оторбаев чек арачылардын өткөрүү пункттарын жакшыртуу боюнча иштерин баалоо үчүн чек арадан өткөн.
"Өткөрүү пунктундагы темир тордун бир капталы алынган. Кишилер өтүүчү коридор кеңейтилип, күтүп отургандар үчүн отургучтар орнотулган. Эгер мурда чек арадан өткөндөрдүн паспортторун эки киши гана текшерген болсо, азыр алардын саны онго чейин көбөйүптүр", — деп айтылат маалыматта.
Оторбаев ошондой эле "Кордай" көзөмөл өткөрүү пунктунун жетекчиси Ержан Ертурганов менен жолукту. Ал акыркы эки күндөн бери өткөрүү пунктунун иштерин жакшыртуу боюнча иштер жасалып жатканын айтты.
КР акыйкатчысы "Ак Жол" көзөмөл өткөрүү пунктунун башчысы Акыл Асанкулов менен жолукту.
