Чет жакта Эгемендүүлүктүн 25 жылдыгы кандай майрамдалууда?

© Sputnik / Табылды КадырбековКыргызстандын мамлекеттик туусу. Архив
Кыргызстандын мамлекеттик туусу. Архив - Sputnik Кыргызстан
Жазылуу
Эгемендүүлүк майрамы Кыргызстандын бардык булуң-бурчунда белгиленди.

БИШКЕК, 31-авг. — Sputnik. Бүгүн Кыргызстан Эгемендүүлүгүнүн 25 жылдыгын белгилеп жатат. 1991-жылдын 31-августанда Кыргызстан өзүн суверендүү мамлекет деп жарыялаган.

Эгемендүүлүктүн 25 жылдыгы кыргыздар жашаган башка мамлекеттерде кандай майрамдалып, белгиленип жатканын Sputnik Кыргызстан агенттигинин кабарчысы кызыгып көрдү.

Москва… Майрамдык маанай…

Россияда иштеп, жашап жүргөн мекендештер бүгүн майрамды анчейин деле белгилешпейт. Себеби, ондон ашык кыргызстандык кыз-келиндердин өмүрүн алган окуядан кийин мекендештер өздөрүнө келе электигин көп жылдардан бери Москва шаарында иштеп-жашап жаткан Жылдыз Осмонова Sputnik Кыргызстан агенттигине билдирди.

"Көпчүлүктүн үшүн алган каргашадан кийин Москвадагы мекендештердин майрамдык маанайы деле жок. Чынында майрам экенин ойлогон деле жокпуз", — дейт Осмонова.

Түркияда үч айга чукул кырдаал киргизилген

Түркияда болгон акыркы окуялардан улам өлкө аймагында ири иш-чараларды өткөрүүгө тыюу салынганын Стамбул шаарында окуп-иштеп жүргөн Айпери Сейитбекова билдирди.

"30-август Түркияда Жеңиш майрамы. Бул майрам деле мурдагыдай чоң масштабда белгиленген жок. Себеби, акыркы окуялардан улам өлкөдө үч айга чукул кырдаал киргизилген. Андыктан Түркиядагы кыргызстандыктар деле быйыл чоң иш-чараларды уюштурган жок", — дейт Сейитбекова.

Ал ошондой эле былтыр Түркиядагы элчилик жана консулдук Эгемендүүлүк күнүнө карата майрамдык иш-чараларды уюштурганын кошумчалады.

Италияда майрам октябрда белгиленет

Празднование 25-летия независимости Кыргызстана в Бишкеке на площади Ала-Тоо - Sputnik Кыргызстан
Сапка тизилген жоокерлер жана аскер техникасы: Ала-Тоо аянтындагы майрамдан сүртүмдөр
Италияда жашаган кыргызстандыктар азыр эмгек өргүүсүндө болуп мекенинде жана башка жактарда болгондуктан майрамды белгилөө боюнча программалар уюштурулбаганын Милан шаарында окуп-иштеп жүргөн Бурмачач Томоева билдирди.

"Бүгүн Милан шаарында жашаган мекендештер бири-бирибизге телефон чалып эле куттуктап койдук. Анан калса бүгүн бизде жумуш күнү. Азыр мекендештерибиздин көбү эс алууда болуп, башка жакта болгондуктан чоң программадагы иш-чаралар өтпөйт. Бирок биз 29-октябрда Милан шаарында чоң концерттик программа уюштурабыз. Ошондо Эгемендүүлүктүн 25 жылдыгын дагы белгилейбиз. Бул учурда Италияда кыргызстандыктар көп болуп калат", — деди ал.

Австралияда 40тай киши чогулат

Австралияда Эгемендүүлүктүн 25 жылдыгын белгилөө үчүн ушул ишемби күнү 40тай киши чогула турганын Мельбурн шаарында иштеп жаткан мекендешибиз Алтынбек Үсөнов билдирди.

"Бүгүн иш күнү болгондуктан майрамды өткөрүүгө чогула алган жокпуз. Буюрса ишемби күнү 40тай киши чогулуп, Эгемендүүлүк күнүн белгилейбиз", — дейт Үсөнов.

Белгилей кетсек бүгүн Бишкек шаарындагы Ала-Тоо аянтында аскердик парад өтүп, ага калаа тургундары менен коноктору күбө болду.

Жаңылыктар түрмөгү
0