БИШКЕК, 30-авг. — Sputnik. Кытай элчилигинде болгон жарылуу Эгемендүүлүк күнүнө карата боло турчу иш-чараларга таасирин тийгизбейт. Бул туурасында Маданият жана тарых жылын өткөрүү, даярдык көрүү боюнча мамлекеттик дирекциянын жетекчиси Султан Раев Sputnik Кыргызстан агенттигине билдирди.
Шейшемби күнү Кыргызстандагы Кытайдын элчилигинин кире беришинде жан кечти автоунаа менен келип имараттын эшигин сүзүп, жарылып кеткен. Укук коргоо органдары жан кечтинин каза болгонун билдири, дагы үч киши жаракат алганын маалымдаган.
"Теракт майрамдык иш-чараларга эч кандай таасир бербейт. Бардыгы мурда пландалгандай болот. Себеби, бул мамлекеттин негизги майрамы", — деди Раев.
31-августта Кыргызстан Эгемендүүлүгүнүн 25 жылдыгын белгилейт. Бул күнү Бишкек шаарында аскердик парад, ат чабыш, көк бөрү оюндары болуп, майрамдык концерттер өтөт.
Кыргызстан 1991-жылы 31-августта Эгемендүү мамлекет болгон.
