БИШКЕК, 28-авг. — Sputnik. Президент Алмазбек Атамбаев Москвадагы өрттө каза болгондордун туугандарына жана жакындарына көңүл айтты. Бул туурасында мамлекет башчынын маалымат кызматы билдирди.
Ишемби күнү Москванын түндүк-чыгышында болгон өрт кыргызстандык 15 жарандын өмүрүн алып кетти.
"Президент Алмазбек Атамбаев Москвадагы кампадагы өрттөн каза болгондордун жакындарына жана туугандарына көңүл айтты", — деп айтылат маалыматта.
Бул кыргызстандык жарандар өрткө кабылып каза тапкан биринчи окуя эмес. Буга чейин 30-январда ушул эле Москва шаарынын Стромынка көчөсүндөгү Чыгыш административдик округда өрт чыгып, 12 киши каза тапса, алардын ичинен 8и Кыргызстандын жараны, экөө атуулдугу башка, бирок, КРде туулган адамдар болгон. Анда жалпысы болуп 3 миң чарчы метр аянттын өрттөнгөнү кабарланган.
