БИШКЕК, 20-авг. — Sputnik. Өлкөнүн түштүк аймагынан Меккеге бара турган зыяратчылар 21-августта таңкы саат 3:00дө эл аралык "Ош" аба майданынан учуп кетет. Бул туурасында Sputnik Кыргызстан агенттигине Ош облусунун мусулмандар казыятынын маалымат кызматынын өкүлү Нургазы Каримов билдирди.
Кыргызстандан Меккеге аттангандардын алгачкы тобу 17-август күнү таңда Бишкектеги "Манас" эл аралык аба майданынан учуп кеткен.
"Бул сапар алгач Ош шаарынан аттанган зыяратчылар учат. Андан кийин Ош, Жалал-Абад жана Баткен облустарынын жашоочулары аттанат", — деди Каримов.
Казыяттан учуу атайын графиктин негизинде түнкү убакытка туура келерин, бир рейсте 5 тайпадан турган 250 зыяратчы болорун кошумчалашты.
Ажыга сапар алгандардын акыркы тобу 29-августта учуп кетет.
Быйыл ажыга Кыргызстандан 3685 адам барат. Мусулмандык парздын бирин аткарып келүүгө жумшала турган чыгымдын баасы — 2600 доллар.
