Министр Боронов: табигый кырсыктын кесепети анча чоң эмес

Жазылуу
9-майда болгон табигый кырсыктан Талас жана Баткен облустарында 900гө чукул үйлөр жана социалдык жайлар жабыр тарткан. Ал эми Жалал-Абадда сел жүрүп, турак жайларды каптаган.

БИШКЕК, 11-май — Sputnik. 9-майда болгон катуу шамал менен мөндүрдөн келтирилген зыян анча көп болгон жок. Бул тууралуу Өзгөчө кырдаалдар министри Кубатбек Боронов Sputnik Кыргызстан маалымат агенттигине билдирди.

Ал учурда келтирилген зыяндын көлөмү эсептелип жаткандыгын айтты.

"Келтирилген зыян анча көп эмес, компенсация алчулар болсо берилет",— деди министр.

Буга чейин министр Боронов өкмөт жыйынында Баткендеги катуу шамал облус аймагы боюнча 866 турак жайдын 10 миңге чукул шиферин учуруп кеткендигин билдирген. Андан сырткары 17 социалдык жай 833 шиферинен ажыраган. 

Көбүрүп-жабырган Көгарт дарыясы жээкти улам жеп келе жатат
Ал эми Талас облусунда мөндүр аралашкан катуу жамгыр жаап, мектептер менен райондук прокуратуранын чатырынын шиферлерин учуруп кеткен.

Жалал-Абад облусунун Базар-Коргон жана Сузак райондорунда сел жүрүп, турак жайларды суу каптап, жолдор бузулган. Ал эми Сузактын Үч-Көз айылы аркылуу өткөн Көгарт дарыясы нугунан чыгып, улам жээкти жеп келе жатканын жергиликтүү бийлик өкүлдөрү менен тургундар тынчсызданып билдиришүүдө. 

Биринчи вице-премьер Мухамметкалый Абулгазиев жыйындын соңунда ӨКМ менен жергиликтүү бийликке аймактарды табигый кырсыктардын кесепетинен арылтуу жана суу жээктерин бекемдөө, арыктарды тазалоо боюнча тапшырма берди.

Жаңылыктар түрмөгү
0