БИШКЕК, 28-апр. — Sputnik. Бишкекте пенсионерлер үчүн акысыз компьютердик курстар ачылат. Бул тууралуу Sputnik Кыргызстан агенттигине "Тең мүмкүнчүлүктөр" социалдык борборунун жетекчиси Елена Бочарникова билдирди.
Ал аталган долбоор Кыргызстанда биринчи ирет ишке кирип жатканын кошумчалады.
"Учурда бардык каалоочуларды каттоо жүрүп жатат. 7-майда аларды чогултуп, тайпаларга бөлөбүз. Ар бир пенсионердин өзүнчө көйгөйү бар. Бирөөсү жакшы укпаса, экинчиси жакшы көрбөйт. Андыктан аларга өзүнчө ыкма менен үйрөтүү зарыл. Борбордо 3-4 жылдык тажрыйбасы бар окутуучулар кызмат кылат", — дейт Бочарникова.
Борбор жетекчиси компьютердик курстар акысыз экенин кошумчалады.
"Биз пенсионерлерди окутуу үчүн донорлорду таптык. Мындан сырткары, КРдин Социалдык өнүгүү министрлигине кат жолдогонбуз. Алардан азырынча жооп келе элек", — дейт адис.
Ал окуу курстары бир жарым айга созуларын, кээ бир карыларды окутуу убактысы узартыларын кошумчалады.
Аталган борбордо мүмкүнчүлүгү чектелгендер да билим алса болот.
