Сариев: Чолпон-Ата ипподрому эл аралык стандартка жооп бериши зарыл

Жазылуу
Өкмөт башчы ипподром эмдиги жылы өтө турган II Дүйнɵлүк кɵчмɵндɵр оюнун өткөрүүгө ылайыкташтыруу керектигин белгиледи.

БИШКЕК, 14-ноя. — Sputnik. Чолпон-Ата шаарында курулуп жаткан ипподром долбооруна премьер-министр Темир Сариев өзгөртүү киргизди. Бул тууралуу өкмөт башчынын Ысык-Көл облусуна болгон иш сапарынын алкагында белгилүү болду.

Алгач өкмөт башчы шаардагы дене тарбия жана спорт комплексинин курулушу менен таанышып, аталган объектинин орчундуу маанисине токтолду. 

Премьер-министр Кыргызстана Темир Сариев. Архив - Sputnik Кыргызстан
Сариев Ысык-Көл облусундагы объектилерди кыдырууда
Маалыматка ылайык, беш миң чарчы метр аянтка курулган спорт комплекс 1000 адамга ылайыкташкан. Комплексте курулган бир нече залдарда Кɵчмɵн цивилизациясынын борбору жайгашат. Анын курулушун 2016-жылдын август айында бүткɵрүү пландалууда.

Мындан соң премьер-министр Чолпон-Ата ипподромун реконструкциялоо долбоору менен таанышты. Анда ипподромду 10 миң кɵрɵрманга ылайыкташтыруу, конференц-зал, буфет, терраса, 40 кишилик VIP-трибуна жана унаа токтоочу жай куруу каралган. Реконструкция эмки жылы өткөрүлө турган II Дүйнɵлүк кɵчмɵндɵр оюнуна карата жүргүзүлүүдө.

Сариев курулушту сапаттуу жүргүзүү зарылдыгын белгилеп, эл аралык стандартка тɵп келтирүү үчүн долбоорго ɵзгɵртүү киргизүүнү тапшырды. 

"Ипподромдун ат чабылчу бɵлүгүн эл аралык талаптарга ылайыкташтыруу керек", — деди өкмөт башчы.

Ошондой эле премьер-министр ипподромдун реконструкциясын ɵз мɵɵнɵтүндɵ бүткɵрүү зарылдыгын кошумчалады.

Жаңылыктар түрмөгү
0