БИШКЕК, 16-окт. — Sputnik. Бишкек мэриясы Киев жана Бөкөнбаев көчөлөрү 15-октябрдан тарта бир тараптуу болгону тууралуу жарандарды уюлдук телефондорго SMS-билдирүү жөнөтүү менен кабардар кылып жатат.
Уюлдук операторлордун абоненттерине "Meriya" контактынан билдирүү келүүдө. Анда толук маалыматты 185 номери боюнча алууга болору айтылууда.
Москва жана Токтогул көчөлөрү мурдагыдай эле коомдук транспорттон башка кыймыл үчүн бир тараптуу боюнча калат. Мындай тартип киргизилгенден кийин Чүй проспектинде жол кыймылына коюлган чектөө кечкисин алынат.
Буга чейин вице-мэр Геннадий Милицкий унаанын саны көбөйүп, борбордук көчөлөр толуп калып жатканын айткан. Мындан улам маршруттардын багытын өзгөртүү чечими кабыл алынган.
Жол кайгуул кызматы алгачкы үч күн аталган көчөлөрдөгү эреже бузуулар үчүн айдоочуларга айып пул салбай, түшүндүрүү иштерин жүргүзө турганын билдирген. Үч күндөн кийин жол эрежесин бузган айдоочуларга карата административдик чаралар көрүлмөкчү.
