БИШКЕК, 25-авг. — Sputnik. Премьер-министр Темир Сариев Синцзянь-Уйгур автономиялык району Кыргызстан үчүн Кытайга чыгуучу жол экенин аталган аймактын төрагасынын орун басары Ши Даганды кабыл алуу учурунда билдирди.
Жолугушууда Кыргызстан менен Синцзянь-Уйгур автономиялык районунун ортосундагы соода-экономикалык, маданий-гуманитардык кызматташтыктын абалы жана келечеги талкууланды.
Сариев Кытай Кыргызстандын негизги өнөктөшү экенин билдирип, эки өлкөнүн кызматташтыгында Синцзянь-Уйгур автономиялык районунун мааниси өзгөчө экенин белгиледи.
"Бул аймак аркылуу соода жолдору куралган. Ошондуктан Кыргызстан кызматташтыкты өнүктүрүүгө кызыкдар", — деди өкмөт башчысы.
Өз кезегинде Ши Даган Синцзянь-Уйгур автономиялык району Кыргызстан менен мамилени бекемдөө ниетинде экенин билдирип, Сариевдин бажы пункттарынын иштөө мөөнөтүн узартуу сунушун колдой турганын кошумчалады.
