БИШКЕК, 4-авг. — Sputnik. Үч россиялык жана бир польшалык альпинисттин сөөгү Баткен облусунан тик учактар менен чыгарылганын КР Куралдуу күчтөрүнүн Башкы штабынын маалымат кызматы билдирди.
Маалыматка ылайык, россиялык альпинисттер Ленин чокусунун аймагында, польшалык жаран Кадамжай районунда каза болгон. Акыркысынын денесин суунун шары катуу болгонуна байланыштуу төрт күн бою чыгара алышкан эмес.
Башкы штаб ӨКМнын куткаруучуларына жабыр тарткандарды куткаруу жана өлгөн адамдарды эвакуациялоо иштерине ар убак жардам көрсөтүлүп турарын белгилейт.
Быйыл абадан коргонуу күчтөрүнүн авиациясы 10дон ашык ирет учуп чыгып, жалпысынан 26 адамдын өмүрүн сактап калып жана 8 адамдын сөөгүн алып чыккан.
