БИШКЕК, 15-июнь — Sputnik. Бишкек шаарында апрелдин башында төрөлгөн төрт эмге президент тарабынан бөлүнгөн каражатка сатылып алынган батирдин ачкычы тапшырылды. Андан сырткары "KG групп" компаниясы бөбөктөр үчүн бир нече бөлмөлүү батир белек кылгандыгын билдирди.
"Туңгуч" кичирайонунда жайгашкан эки бөлмөлүү батирдин ачкычын Гүлайым Абдылдаева менен Нурлан Зарнаевге Бишкек шаарынын мэриясынын аппарат жетекчиси Нурдин Тынаев тапшырды.
"Президент Алмазбек Атамбаевдин өзүнүн фондусунан үй куруп берүүгө каражат бөлгөн, бирок, ал ишти көпкө созбой, көп кабаттуу үйдүн ичинен эки бөлмөлүү батирди таап, ачкычын тапшырганы келдик",— деди Тынаев.
9-апрель күнү Бишкек шаарындагы Эне жана баланы коргоо улуттук борборунда 34 жаштагы Гүлайым Абдылдаева төрт эм уул төрөгөн. Ымыркайларга Алмазбек (президенттин урматына), Асылбек, (ЖК төрагасы Асылбек Жээнбековдун урматына), Кубанычбек (Бишкек мэри Кубанычбек Кулматовдун урматына) жана Камчыбек (Эне жана баланы коргоо улуттук борборунун башчысы Камчыбек Узакбаевдин урматына) деген ысымдар ыйгарылган.
