Вице-премьер: "Коопсуз шаар" долбоорун үзгүлтүккө учураткандар болсо жоопко тартылат

Жазылуу
"Коопсуз шаар" долбоорун ишке ашырууга өкмөт кызыктар.

БИШКЕК, 18-мар. — Sputnik. Вице-премьер-министр Абдырахман Маматалиев өкмөт жарандардын коопсуздугун камсыздоо үчүн "Коопсуз шаар" долбоорун тез арада ишке ашырууга кызыктар экенин ведомство аралык иштиктүү топтун кеңейтилген жыйынында билдирди. Бул тууралуу өкмөттүн аппаратынын маалымат кызматы билдирди.

"Коопсуз шаар" долбоору үзгүлтүккө учуратылса, же кызматтык жактар өз милдеттерин так аткарбай жаткан фактылар аныкталса, күнөөлүү жактар жоопкерчиликке тартылат. Керек болсо кылмыш жоопкерчилигине дейре тартылат", — деди ал.

Маматалиев ошондой эле, долбоордун ишке ашырылышы ачык-айкын болуп, ар-кандай коррупциялык көрүнүштөр четке кагылууга тийиш экенин белгиледи.

Ички иштер министри Мелис Турганбаев, тендер өткөрүүдө орун алган мыйзам бузуулар боюнча өзүнүн кооптонуусун билдирди.

ИИМ "Коопсуз шаар" боюнча тендердин жыйынтыктарына каршылыгынын себебин түшүндүрдү
Жыйында КР өкмөтүнүн аппаратынын коргоо, укук тартиби жана өзгөчө кырдаалдар бөлүмү тарабынан "Коопсуз шаар" долбоорунун ишке ашырылышын талдоо сунушталды. Экономика министрлигинин статс-катчысы Асел Курманова тендерди ишке ашыруунун бардык баскычтары Кыргызстандын мыйзам ченемдерине ылайык ишке ашырылгандыгын жана тендердин жыйынтыгына таасир берүүчү кандайдыр бир эреже бузууларга жол берилбегендигин белгиледи.

Кеңешме жыйынтыгы боюнча Ички иштер министрлигине "КР мамлекеттик-жеке өнөктөштүк жөнүндө" КР Мыйзамынын талаптарын аткаруу максатында, Кыргызстандын кызыкчылыгын эске алуу менен тендерди жеңип алган компания менен түзүлүүчү келишим ченемдерин толуктап иштеп чыгууга багытталган ишти улантуу тапшырмасы берилди.

Жаңылыктар түрмөгү
0